Stormen tok knekken på lotusen

Fredag kveld vart lotus-skulpturen i Halsvikvågen høgtidleg overlevert til follket i Gulen og Masfjorden. Men alt måndag var han avblomstra. Stormen natt til måndag hadde brote han sund.
? Det var ein som bur i Halsvikvågen som oppdaga dette ved sekstida måndag morgon. Då hadde det blese svært sterkt om natta, fortel Ivar Eide i Halsvikvågen Isbadarlaug til Strilen.
Det var dei som fekk frakta lotusen frå Bergen til Halsvikvågen der lotusen skulle liggja som eit inspirasjonssymbol.

Gjort jobben
? Eigentleg er det utruleg at lotusen har halde så lenge, så han var solid bygd. Men med slikt ver det har vore i det siste, var det ikkje uventa at han skulle bryta saman, seier Eide.
No vert restane tekne på land, og onsdag kveld skal ein avgjera kva som skal skje med han. Men truleg er det ikkje mykje å gjera.
? Men lotusen har gjort sin funksjon, og inspirasjonen er overlevert. Blomstrar har kort levetid. No er det opp til folket å følgja opp, seier Eide.
Lotusen skulle mellom anna vera ein inspirasjon for å få opp folketalet i dei to kommunane.