Stort besøk

Treng du løfta noko som veg 14.200 tonn, er det berre å slå på tråden til det nederlandske rederiet Heerema. Då sender dei truleg det største kranskipet i verda, SSCV «Thialf».
Skipet med 202 meters lengde og 88 meters breidde har opphalde seg i Fensfjorden sidan måndag.
Eitt av dei lokale gjeremåla vart utført ved kai hjå Wergeland Halsvik i Sløvåg.
– Ein slepebåt kom inn til kai hjå oss med ein lekter, der det var plassert ein plattformmodul. Denne modulen løfta «Thialf» om bord til seg og skal frakta vidare, opplyser hamneansvarleg Per Wick.
No ligg det svære kranskipet utanfor Mongstad Sør, inntil det seglar vidare i dag eller ein av dei nærmaste dagane.
– «Thialf» får no om bord forsyningar, som vert tatt ut til skipet frå Mongstad Sør med følgeskip. Det vert også gjennomført bytte av mannskap og litt testing, opp­lyser Frode Ben­dik­sen i skipsagenten Kuehne+Nagel sitt Bergens­­­kontor.
Der har det siste dagane vore hektisk aktivitet for å koordinera «Thialf» sitt besøk i Fensfjorden på beste måte.
På Wikipedia kan ein lesa at det er Heerema Marine Con­trac­t­ors som opererer «Thialf». Verdas største kranskip vart bygd i 1985 for selskapet McDermott av skipsverftet Mitsui Engeneering & Shipbuilding. Hereema tok over som eigar i 1997. Skipet har to kranar og brutto tonnasje er 136.000 tonn.