Stort engasjement på Gulatingsstaden

Tidlegare miljøvernminister Børge Brende (H) snakka til mellom 350 og 400 ungdommar då Ungdommens Gulating var samla på Flolid fredag i førre veke.
Arrangementet sette fokus på korleis den globale oppvarminga slår ut, og kva me kan gjera for å hindra meir global oppvarming.
? Eg er svært godt nøgd med arrangement, seir Karl Oskar Teien til Strilen.
Teien er elev ved Røde Kors United World College i Flekke i Fjaler og tok initiativ til å få arrangementet i stand.

Eigne erfaringar
United World College har elevar frå over 80 ulike land, og på Ungdommens Gulating fortalde ungdommar både frå Portugal, Maldivene, Botshwana, USA, Etiopia og fleire andre land korleis den globale oppvarminga hadde påverka deira nærmiljø. Både tørke og matmangel kan verta konsekvensane.
? Og så vart ungdommane oppfordra til å koma med forslag til ei ny klimalov, fortel Teien.
Forslaga vart overleverte til Børge Brende, som lova å ta dei med til Stortinget.
Ungdommane avgav også klimaløfte på store kort.

FN-sambandet
Fleire organisasjonar var til stades på arrangemnetet som samla ungdommar både frå Hordaland og Sogn og Fjordane, Folk både frå FN-sambandet, World Wildlife Fund og Inspire Antractica Expedition hadde innleiingar på tinget, der dei presenterte sine syn på kva som kan gjerast med klimatrusselen i verda.

Musikk
Men det var ikkje berre politikk og miljø på ungdomstinget. Innimellom var det musikk, og den stod bassgitaristen Matias Tellez, Alexander Pavelich, banda Barabass, JetLag og fleire andre for.
? Det heile fungerte bra, og veret var også på vår side, seier Teien, som alt  er i gang med å planleggja Ungdommens Gulating også til neste år.
? Eg håpar dette skal verta eit årleg arrangement, seier han.

Innsamling
Laurdagen drog ein del av ungdommane frå skulen i Fjaler til Bergen for å samla inn pengar til eit prosjekt i ein by i landet Niger i Afrika. Denne byen har stor mangel på vatn. I går hadde Teien ikkje oversikt over kor mykje pengar som kom inn under aksjonen.