Strålar for vidare drift

– Me er veldig, veldig glade. Dette må vel kallast ei skikkeleg solskinshistorie,  seier styrar Mona Uglum Osberg etter at avtalen for Solstrålen barnhage kom i boks.

Avtalen er inngått mellom noverande eigar Flatøy Kvinne- og familielag og den landsomfattande private aktøren Læringsverkstedet, som tek over. Det er ein avtale som sikrar både fire fast tilsette og deltidshjelp vidare jobb frå nyttår.

Med underskot dei siste åra har framtida for barnehagen ved Flatøy skule vorte stadig meir usikker. Men no ser styraren og dei andre tilsette for seg ei langt tryggare framtid.

Treng fleire born
Tidlegare i år gjekk Meland kommune inn med eit ekstratilskot på ein halv million kroner. Dei pengane er no brukte opp, og barnehagen vil ikkje klara å driva heilt i balanse den siste tida heller, seier styraren.

Men for ho og dei andre tilsette er det ny drift som tel.

– Alle har levd i håpet om å vera sikra jobb også etter nyttår. Mange foreldre har også stillt opp med materiell for å driva barnehagen. Sjølv jobbar eg no med å få inn fleire born. Me har vore 19 born, medrekna dei yngste som tel for to. Frå nyttår gjer reglane at dei yngste berre tel for eitt barn, og då går me ned i 14 om me ikkje får inn nye born. Målet er å auka til ei avdeling på 24 born.

– Er det vanskeleg å «få tak i» fleire born?
– Eg har nettopp starta, men går etter kommunen si venteliste. Der har det vore operert med opp i 80 born, men ikkje alle har nok rett på plass. Likevel reknar me med at det skal gå bra å få inn fleire born, seier Uglum Osberg.

Håp om nybygg
Ho peikar på at dersom barne­hagen kjem opp i 24 born, vert det ein langt tryggare og meir forutsigbar økonomi.

– Då vert det eit heilt anna samsvar mellom utgifter og inntekter, seier styraren. Blant anna vil dagens bemanning vera stor nok til å ta seg av ei full avdeling på 24.

Læringsverkstedet jobbar også med å få i gang ein barnehage i Bergen. Og på Flatøy håpar styraren at det på sikt kan verta ei ny, privat barnehage.

– Læringsverkstedet er ein stor aktør, som me håpar vil satsa på nybygg på Flatøy. Då kan ei rulleting av kommunen sin barnehageplan opna for dette, seier styrar Mona Uglum Osberg.