Strid om to hus på gardane

? Ei hovudmålsetjing med den nye kommuneplanen er å snu den negative utviklinga av folketalet i kommunen. Me meiner at eitt tiltak er å gjera det lettare for dei som veks opp på gard, å få fråskilt tomt på garden. Difor vil me tillata hus nummer to utan at det er snakk om kårhus, seier ordførar Håkon Matre til Strilen.

Dette er retningsliner som politikarane vil ha inn i føresegnene for kommuneplanen, som truleg vert vedteken 15. desember.

Men landbruksdirektøren og fylkespolitikarane er ikkje samde i dette. Då fylkeslandbruksstyret hadde oppe kommuneplanen i Masfjorden nyleg, vedtok dei at hus nummer to på gardane må sjåast i ein landbruksfagleg samanheng. Huset bør også liggja i tilknyting til tunet på garden. Det inneber at dei ikkje vil at målsetjingar når det gjeld folketal, skal ha avgjerande vekt.

? Me skal ha denne saka oppe i formannskapet på tysdag, og det er heilt klart at me ikkje utan vidare vil bøya oss for det fylkeslandbruksstyret seier. Å opna for busetnad på gardane var eit viktig element i vår strategi for auka folketal, seier Matre. Han viser og til at andre kommunar har tenkt i same banar, sjølv om han ikkje veit om nokon har teke det direkte inn i kommuneplanen. Matre reknar med at det også kan vera aktuelt å drøfta saka med landbruksavdelinga hjå Fylkesmannen for å finna formuleringar som begge partar kan godta.