Super cup på supert underlag

Radøy/Manger deltok med mange lag i turneringa, mellom anna minijenter-95. Reint sportsleg gjekk det ikkje heilt vegen for dei unge lovande, men dei syntest likevel det var kjekt å spela fotball-cup.

? Det har gått dårleg, men det har vore kjekt for det. Vi har spelt tre kampar, mot NBK Alvidra, Kvernbit og Bergen Nord, men vi har tapt alle, fortel ei av jentene.

Kvernbit-cup er den andre turneringa jentene er med i, og den første som vert spelt utandørs.

? Vi har spelt cup i hallen før. Men det gjer jo ikkje noko å spela ute når det er så fin bane å spela på, seier ei anna fotballjente.

Sterkt av Kvernbit
Også arrangørklubben Kvernbit stilte med mange lag i cupen. I klassen lilleputt gjorde dei kvite og svarte sine saker svært så bra.

? Vi har vunne dei to første kampane, 2-0 mot Radøy/Manger og 2-0 mot NBK Alvidra. Men denne kampen var litt jamnare, fortel Arild Jansen, medan han følgjer med korleis lagkameratane gjer det i siste kamp mot Dale miniputt.

? Vi har eit bra lag, og vi pleiar å vera med på cupar. Har spelt både i Knarvik og på Voss, fortel han vidare.

Ros til arrangøren
I Dale-leiren er også stemninga god, trass i at dei har reist langt for å stå ute i regnet. Gjestane meiner Kvernbit-cup er organisert på ein veldig god måte.

? Vi storkosar oss. Har hatt ein flott tur nedover, og her har kampane gått slag i slag med akkurat passeleg ventetid. All ære til arrangørane for dette. Dei fortener ros, seier ein av dei tilreisande dalebuane.

Mykje har skjedd sidan den gong Kvernbit-cup var eit tidleg vår-fenomen, skoa var våte før kampen starta og hotdogane kosta ti kroner stykke. Men cupen har utvilsamt heva seg til ein folkefest folk garantert vil tilbake til.