Svar om U864 innan 1. desember

Den tyske ubåten kan innehalda så mykje som 65 tonn kvikksølv, og Kystverket arbeider no med å finna ut korleis ein best kan hindra at denne gifta kjem ut i sjøen.
Skipet «Geoholm» har dei to siste vekene gjort undersøkingar ved vraket, men desse vart i helga stoppa då ein under fjerning av sediment på botnen ved vraket oppdaga at ubåtvraket flytta på seg.
? Ein var i ferd med å ta vekk sediment slik at ein kunne koma inn i kjølen, forklarar beredskapsdirektør i Kystverket Tor Christian Sletner.
? Det vart då beordra stopp i arbeidet, for me kunne ikkje risikera å gjera noko som fekk vraket til å skli eller snu seg.
I samband med dei siste undersøkingane har ein også sett at delar av skroget har opna seg.
? Me var på førehand gjort merksame av Veritas om at sveisane kunne opna seg, og fekk stadfesta dette.

Opning utelukka
Å ta seg inn i kjølen på skroget og ta ut kvikksølvflasker var eitt av måla med dei siste undersøkingane. Når ein ikkje lukkast med dette betyr det at ei tømming av vraket også er utelukka som alternativ for å fjerna eller sikra kvikksølvet.
Tidlegare har ein hatt tre alternativ for å hindra meir kvikksølvforureining frå U864, anten å fjerna vraket med kvikksølvet i, dekka til vrak og kvikksølv på botnen, eller å ta kvikksølvflaskene ut av vraket og berre heva desse. Dette siste er altså utelukka no.
? No er det ei heving av vraket eller ei tildekking som står att, utan at eg vil forskottera kva me vil gå for, seier Sletner.

Teknologien finnest
Det nederlandske bergingsfirmaet Smit Salvage BV har utarbeidd ein rapport om kva som kan gjerast med det tyske ubåtvraket, og denne rapporten vil saman med ein rapport frå NIVA (Norsk institutt for vassforsking) og Geoconsult sine undersøkingar gje grunnlag for Kystverket si anbefaling.
? No skal me ha inn all tilgjengeleg kompetanse og ekspertise for å finna ut kva som skal gjerast med U864, seier Sletner.
Beredskapsdirektøren seier at det i dag eksisterer teknologi tilstrekkeleg til å heva eit slikt vrak. Utfordringa er at ein ikkje tidlegare har gjort ei heving av eit vrak lasta med 65 tonn kvikksølv.
? Me må ta omsyn til miljørisikoen, og jobbar for å hindra at kvikksølv lek ut og kjem inn i næringskjeda. Dette handlar om Noreg sitt ry som fiskeriprodusent og fiskerinasjon, seier Tor Christian Sletner.
Les meir om undersøkingane ved U864 i Strilen torsdag 21. september.