Svart år på Flatøy

Nedgangen etter finanskrisa slo for fullt ut for Frank Mohn Flatøy AS i 2010. Driftsinntektene gjekk ned frå 885,8 mill. kroner i 2009 til 494,0 mill. i 2010.Og medan ein i 2009 kunne visa til eit solid driftsresultat på 36,6 mill. kroner, viser fjoråret ein minus på 28,2 mill.

Frank Mohn Flatøy lagar mange ulike typar pumper til offshoreverksemda. Dei lagar også utstyr til Framo Engineering og oljevernutstyr til bruk til havs.I årsmeldinga vert det vist til at dei internasjonale marknads­tilhøva har ført til både mindre etterspørsel og redusert aktivitet, og dette har også ført til færre tilsette. Ved nyttårsskiftet 2009/2010 hadde verksemda 351 tilsette, medan talet eitt år seinare var 312.

Betring

Men no begynner ein å sjå lys i tunnelen, og tilgangen på faste ordrar ved inngangen til 2011 var klart betre enn eitt år tidlegare.I 2010 stod olje og gass for 64 prosent av selskapet sin omsetnad, medan produksjon av miljøutstyr utgjorde 34 prosent.

Trass i dårlege tider vart det investert for 22,6 mill. kroner på Flatøy i fjor.
Pluss på HjertåsFrank Mohn Piping AS på Hjertås hadde også nedgang i omsetnaden i 2010, men tilpassing av aktiviteten i høve til ordretilgangen og  færre tilsette gjorde at ein likevel kom ut med ein pluss i driftsresultatet på 18,3 mill. kroner.

I årsmeldinga heiter det at ein forventar eit nytt svakt år i 2011, og at ordrereserven ved årsskiftet var lågare enn i fjor.Talet på tilsette var ved årsskiftet 2009/2010 79, mot 59 eitt år seinare.Frank Mohn Piping produserer røyranlegg til konsernet sine pumpesystem.

Minus på Mongstad

Det tredje selskapet i Nordhordland i Frank Mohn-konsernet er Frank Mohn Mongstad AS. Dei leverer varer og tenester til olje- og gassverksemda i Nordsjøen.

Her gjekk omsetnaden opp i 2010, men likevel kjem verksemda ut med minus. Det gjorde dei og året før.

I årsmeldinga vert det vist til at konkurransen stadig vert hardare.Ein merkar og at Statoil har flytt sitt røyrlager frå Mongstad til Florø.Difor må ein satsa på fleire bein for å halda oppe sysselsetjinga. Ein jobbar og med å gjera produksjonen meir effektiv.

Strilen har prøvt å få ein kommentar frå konsernleiinga i Frank Mohn AS, men har så langt ikkje lukkast med det.