Sykla tryggast i Hordaland

Målet med denne konkurransen var ikkje å sykla fortast. Men arrangørane skulle kåra den mest trafikksikre syklisten. For å finna ut det måtte deltakarane gjennom både ei teorioppgåve og ei tre kilometer lang sykkelløype med ein del utfordringar. I denne løypa skulle deltakarane visa at dei køyrer trygt og sikkert og har kontroll på sykkelen. Eirik fekk altså totalt den beste poengsummen av alle dei 31 gutane som deltok i fylkesfinalen.

Teori og praksis
? Det var kjekt. Eg trudde nesten ikkje på det med det same då dei las opp resultata, seier Eirik til Strilen.
Han går i 7. klasse på Sæbø skule. Litt før ferien hadde dei ein liknande test på skulen, og Eirik kvalifiserte seg frå klassen, saman med Anette Sture Sætre, til fylkesfinalen i Bergenshallen torsdag. Og der gjekk det altså over all forventning.
For å gjera det godt i denne konkurransen må ein ha flest mogleg rette svar på ei oppgåve om trafikkreglar. Eirik er litt usikker på om han hadde alt rett på denne teorioppgåva.
? Det var til dømes eit spørsmål om når ein kan sykla på fortauet eg lurte litt på, seier han.
Men fortau er det jo ikkje så mykje av der han bur.
Sjølve syklinga i den tre kilometer lange løypa synest han gjekk heilt greitt.

Attande året
Eirik har sykla så lenge han kan hugsa. Han syklar ein god del i løpet av ei veke, ofte til skulen og til andre aktivitetar. Og det vert nok ikkje mindre etter dette.
Det er 18 året på rad 7. klassingar i fylket konkurrerte om å verta dei mest trafikksikre syklistane. Det er Trygg Trafikk som står bak arrangementet, saman med ein del samarbeidspartnarar. I år starta 64 elevar frå 32 skular frå 13 kommunar i fylkesfinalen i Hordaland.