Sylta vann dobbelt i Knarvikmila

Øystein Sylta var suveren på Knarvikmila i år. Han knuste den gamle bestetida til Terje Aggvin på mila med 57 sekund.
? Det gjekk bra. Veldig bra. Eg kunne berre jaga på heile vegen, seier Sylta nøgd til Strilen rett etter målpassering.
? Eg fekk det litt på slutten, men det gjekk eigentleg flott frå start til slutt. Det losna ikkje før start, men då losna det skikkeleg, seier Sylta, som følgde med på tida under heile løpet.
Klokka stoppa på 30.00 og med det sette 28-åringen frå Meland suverent ny løpsrekord for mila.

Dobbelvinnar
I kvinneklassen var det Kirsten M. Otterbu som var raskast.
? Eg sprang berre for å vinna i dag, seier kvinna som sprang Knarvikmila fortare enn noko anna kvinne har gjort før ho.
Otterbu fekk ingen tider undervegs, og visste ikkje at ho låg an til å springa inn til ny bestetid. Med tida 33.45 forbetra ho sin eigen rekord med seks sekund. Med eit hardt ekstremløp i beina frå dagen før, har ho all grunn til å vera nøgd med eigen innsats i helga. Otterbu vann også samanlagd for kvinner. Både Otterbu og Sylta reiser no til VM i motbakkeløp i Tyrkia.

Sterk Færø-familie
Ein anna som var nøgd med eigen innsats på mila, var Jo Harald Færø. Han vart ikkje blant dei tre beste, men sprang inn på tida 33.33.
? Eg trur eg persa, og eg er svært godt nøgd med løpet, seier ein sliten Færø i målområdet.
Han opna forsiktig, og hadde bestemt seg før start for å ikkje gå tom før tunnelen.
? Og eg sprang bra heile vegen tilbake, seier han og smiler.

Fekk drahjelp
Raskaste kvinne på halvmila var storesøster Sara Rebekka Færø med tida 19.48.
Med eit tungt ekstremløp i beina frå laurdag hadde ikkje 24-åringen frå Eikanger idrettslag tenkt å stilla til start.
? Fem minutt før start bestemte eg meg for å springa, sidan eg likevel stod her, seier Sara Rebekka like etter løpet.
Med seg fekk ho også forloveden Lorentz Erland Linde. Han skulle eigentleg ikkje springa han heller.
? Eg fekk overtalt han rett før start. Han drog meg store delar av vegen, og me kom i mål med eit halvt sekunds mellomrom, seier Færø og gjev kjærasten ein god klem.
Sara Rebekka Færø drog i land sigeren framføre Anita Stenevik og veslesøster Bertine Helene Færø.
? Det var eit kjempetungt løp. Eg passerte Stenevik etter tre kilometer, og klarte heldigvis å halda meg føre, seier Færø.

Førstegangsløpar
Raskast av herrane på halvmila var Ørjan Lunde, som var med på Knarvikmila for første gong.
? Det er eit kjempearrangement. Og løypene er harde. Løpet mitt i dag var heilt greitt. Eg tok ikkje ut alt, seier Lunde.
I Strilen tysdag 5. september finn du alle resultata frå Knarvikmila 2006.