Talentfull Austrheim-jente på kretslaget

Dei beste handballjentene i Hordaland og Sogn og Fjordane har vore samla til fellestrening, og Line Pedersen frå Austrheim har vore med på to samlingar til no.

? Eg var på den første samlinga før nyttår, og ei den 25. januar. I dag tysdag 7. februar skal eg på ei ny samling. Då skal me spela vår første kamp, seier Line til Strilen.

Dersom ho er heldig og flink nok, får ho vera med på kretslaget som skal representere dei to fylka i seinare kampar. Det siste uttaket vert gjort i mars.

? Me har vore 21 jenter på samlingane til no. Dei plukkar vekk folk etter kvart, og dei beste vert igjen til slutt, seier Line.

Ho håpar sjølvsagt å vera ein av dei siste jentene, men er ikkje sikker på om ho er god nok.

? Det er utruleg kjekt, men det er veldig mange flinke jenter med, så konkurransen er hard, seier ho.

Tysdag 7. februar får dei verkeleg testa kor gode dei er. Då spelar dei nemleg kamp mot Askøy sitt tredjedivisjonslag.

? Eg trur me har god sjanse til å vinna, men me får sjå.

Treningane med dei beste jentene i kretsen er litt hardare enn dei ho er van med.

? Me trenar ei økt, og har deretter litt teori. Så spelar me kamp mot kvarandre. Og det er alltid noko nytt å læra, fortel ho.

Dei lærer mange nye trekk, og Line har tenkt å ta med seg kunnskapen tilbake til Lindås. Der trenar ho med damelaget to gonger i veka, og med jenter 15 to gonger.

? Eg jobbar ganske hardt, og håpar at eg kanskje kan spela profesjonelt ein dag.

Ho drøymer om å spela på Tertnes ein dag. Idolet er Gro Hammerseng.

? Men korleis det vert vidare kjem veldig an på skuleval også, seier femtenåringen.

Ho går siste året på Årås skule no, og har søkt kjemi- og prosessfag til hausten.