Tar tak i farleg fylkesveg

Saka skal opp i planutvalet onsdag, og administrasjonen går inn for at ein lagar ein reguleringsplan for heile vegstrekket.
? Det er viktig å få på plass ein plan for strekninga. I denne planen vil og fortau, og kanskje og gang- og sykkelveg, vera ein viktig del, seier Sveinung Toft i Meland kommune.

Auka presset
? Det er no viktig at denne fylkesvegen vert regulert. Det vil det og vera krav om dersom vegen skal utbetrast. Vegen har aukande trafikk og er skuleveg. Deler av vegen er i dag einfelts veg med dårlege møteplassar. Så snart vegen er regulert kan og kommunen pressa meir på for å få løyvingar for utbetring av vegen, skriv administrasjonen i sakspapira til møtet onsdag.
Toft seier at denne vegstrekninga ofte vert nemnd når det er snakk om dårlege vegar i Meland.
? Trafikken er og sterkt aukande, særleg etter at bustadfeltet Heiane vart bygt ut. Vegstrekninga er og rekna som ein del av den planlagde ringevegen i Meland, seier Toft.
Han reknar med at den nye vegen i all hovudsak vil følgja same traseen som i dag, men at det og kan verta snakk om nokre omleggingar enkelte stader. Men det er det for tidleg å seia noko om no, meiner Toft.

Heilskapleg plan
Vegen er i dag under regulering stykkevis og delt. Frå vegkrysset mot riksvegen og til Hatleberget, er Meland utbyggingsselskap tiltakshavar i samband med reguleringsendring for bustadområdet Fossesjøen. Ved Litlebergen har eigedomseigarar i området gått saman om ein felles reguleringsplan, som og dekkjer deler av fylkesvegen fram til Sundet. Det er og fleire andre private reguleringsplanar langs fylkesvegstrekninga. Administrasjonen ønskjer ein best mogleg samanhengande plan for fylkesvegen. Dei private planane må då underordna seg denne.
Ein plan er ein ting, finansieringa av ny veg noko anna. Men med ein ferdig reguleringsplan for vegstrekket, er i alle fall eitt hinder vekke for å få vegstyresmaktene til å gjera noko med vegen.