Tatt i 141 km/t på flytebrua

Fleire ungdommar må belaga seg på fengselsstraffer etter råkøyring i helga. Ein ungdom på motorsykkel vart teken i 141 km/t på Nordhordlandsbrua, der fartsgrensa er 70 km/t. Dette skjedde ved eittida natt til søndag. Mannen vart sjølvsagt fråteken førarkortet på staden. Natta før hadde Lindås og Meland lensmannskontor fartskontroll i 80-sona mellom Lyngfjelltunnelen og Vågseidet på Rv 57. Her vart ein 18-åring som berre har hatt sertifikat ganske kort tid, teken med ein fart på 138 km/t.
? Han kan venta seg ubetinga fengselsstraff, seier lensmann Einar Vatne til Strilen. I den same kontrollen vart ein annan ungdom teken med ein fart på 116 km/t. Det er akkurat noko til å få førarkortet inndrege i tillegg til bot.
Tre bilførarar vart bøtlagde for å køyra mellom 100 og 115 km/t i same kontroll. Og råkøyringa var ikkje slutt med det. I ein kontroll i 60-sona på Bakkøy i Austrheim natt til søndag vart ein motorsyklist mål til 95 km/t. Han miste også førarkortet.
Lensmannen tykkjer det er skremmande at så mange ikkje respekterer fartsgrensene.