TCM kan gje Lindås 35 millionar ekstra

– Me reknar med at saka kjem opp i Nord­hordland tingrett i løpet av hausten, seier rådgjevar Vidar Kolstad til Strilen.
Striden står om testanlegget er å rekna som verk og bruk, slik kommune tolkar reglane.

For 2010 har kommunen skrive ut og fått betalt inn 1.750.000 kroner i eigedomsskatt. For 2011 er det skrive ut 6,65 millionar kroner, og TCM har betalt inn første termin.

– Dette er ei forretningsmessig usemje, utan dramatikk. Det er ingen dårleg stemning mellom oss og kommunen, seier administrerande direktør Tore Amundsen i TCM til Strilen.

Til retten
Det var i slutten av mai kommunen fekk inn stevning frå TCM. Testselskapet går rettens veg for å unngå det som på sikt kan verta 35 millionar kroner i årleg utgift. Det er summen kommunen kan ta inn når anlegget er heilt ferdig i 2012, med sin kalkyle på nær 7 milliardar kroner.

TCM krev at Lindås sine takstar både for 2010 og 2011 vert oppheva. Vinn selskapet, er kravet at kommunen dekkjer alle saksomkostningar.

Ikkje forlik
Rådmannen i Lindås har tidlegare tilrådd eigedomsskatt på alle næringseigedommar. I så fall ville det ikkje vore diskusjon om at TCM måtte punga ut.

– Då ville kommunen og fått ein del ekstra inntekter spesielt frå Knarvik og Lindås Senter og ein del spreidde næringsbygg. Men det har kommunestyret sagt nei til, seier Kolstad.
Ordførar Astrid Aarhus Byrknes seier at partane er usamde om tolkinga av lova, så forlik er uaktuelt.

I januar i år kunngjorde Statoil og Lindås forlik om ny takst for raffineriet og andre anlegg. Kommunen gav slepp på 8 millionar  i året, mot å sikra seg 90 millionar per år fram til 2017. Det innebar og at Lindås måtte betala tilbake 25 millionar innkravd for dei tre siste åra.

Store summar
– Kommunen meiner me følgjer lovverket. Det må ikkje oppfattast som at me ser på Mongstad-anlegg som ei mjøkeku. Industrien der gjev oss også utgifter til ny infrastruktur, blant anna auka vassforsyning, seier Aarhus Byrknes.

Per i dag tek Lindås årleg inn nær 140 millionar i eigedomsskatt. 90 millionar kjem frå raffineriet, kring 20 millionar frå andre anlegg på Mongstad, som oljeterminal og Vestprosess.

Vinn Lindås saka mot TCM, kan det gje kommunen ein auke på nokså nøyaktig 25 prosent i årlege inntekter.

– Har ingen ­produksjon
– Dette er eit testanlegg utan produksjon som ikkje kjem inn under «verk og bruk». Det er vårt viktigaste argument som me meiner å ha dekning for i lova, seier TCM-direktør Tore Amundsen.

TCM vil blant anna visa til fleire dommar om dette i Høgsterett når saka kjem opp i tingretten.

– Ein rettsavgjerd gjeld eit testanlegg i Oslo der Hydro slapp eigedomsskatt, seier Amundsen. Han reknar med at retten vil ha synfaring på TCM før ei avgjerd vert teken.

Dersom Lindås vinn, vil det påføra TCM ein nokså kraftig auke i dei årlege utgiftene.

– Me reknar med driftsutgifter på 200-250 millionar kroner i året ved full drift. Så 35 millionar er ikkje småpengar, ei heller for kommunen, seier Amundsen.

Som største eigar dekkar den norske stat 75 prosent av TCM sine utgifter gjennom selskapet Gassnova. Den andre store eigaren er Statoil med 20 prosent.