Ti år i fengsel for Frekhaugdrapet

Nordhordland tingrett slår fast at drapet på Frekhaug var planlagt, og dei har gjeve mannen maksimalstraffa for forsettleg drap: Ti år i fengsel.
Dermed har aktoratet fått fullt gjennomslag for sin versjon av det som skjedde i brakka på Frekhaug 3. mars i år. I dommen står det at drapet framstår som meiningslaust og bar preg av ei avretting. Skotet vart avfyrt utan at Bakkebø fekk høve til å forsvara seg.
Retten har difor ikkje festa lit til tiltalte, som hevda at skotet var eit uhell, og at det berre var meininga å skremma Bakkebø.

Traumatisk
Retten seier også at det som skjedde i brakka, må ha vore svært dramatisk, ikkje minst for den domfelte sin bror, som var til stades i brakka. Oppleving kan føra til psykiske reaksjonar hos begge, meiner retten.
Bakkebø og domfelte hadde hatt forretningar saman etter at dei møttest i 2001. Domfelte har gjeve som forklaring på det som skjedde, at han kjende seg truga av Bakkebø. Dette finn ikkje retten grunn til å tvila på, men det var ingenting i situasjonen i brakka som skulle tilseia at domfelte skulle kjenna seg truga der og då.

Erstatning
I tillegg til fengselsstraffa må domfelte betala 120.000 kroner i oppreising til dei to sønene til Bakkebø. Vidare må han betala 96.565 kroner i erstatning til den eine sonen.
Han får også inndrege ei rifle og ein revolver.
Det er ikkje kjent om domfelte vil anka dommen, som vart avsagt i dag, tysdag. Domfelte og forsvararen hans var til stades då dommen vart forkynt.