Til Nigeria med miljøteknologi

Soilcare har på Mongstad utvikla ein teknologi som går ut på å reinsa blant anna borekaks frå aktiviteten i Nordsjøen. I prosessen går olja til gjenvinning, og tørrstoffet til jordforbetring og tilsats i asfalt. Dette er snakk om eksport av miljøteknologi som i stor grad er utvikla i Nordhordland.

? Lys framtid
Soilcare har slite i ein del år etter at verksemda vart etablert. Dei har jobba med å utvikla den unike teknologien, og marknaden har også vore vanskeleg. Men på grunn av auka aktivitet i Nordsjøen og større fokus på miljøet, har det heile snudd seg i svært positiv retning frå i fjor haust av, fortel skiftleiar Reidar Krossøy til Strilen.
? Det går veldig bra no. Soilcare har ei lys framtid, seier han.
Dei siste tre månadene har staben til Soilcare på Mongstad auka frå 15 til rundt 20 tilsette. Dei har stor fokus på å vera ei miljøbedrift, og prøver å ta omsyn til dette i alle ledd i verksemda. Dei har og eit tett samarbeid med Statens Forurensingstilsyn, SFT, for å sikra best mogleg drift i høve til miljøet, fortel Krossøy.
 
Reiser måndag
Måndag reiser Krossøy saman med kollega Fred Austrheim til Port Harcourt, som er oljehovudstaden i Nigeria. Der skal dei vera i fire veker og få i gang maskina som vart sendt dit for nokre månader sidan. Dei skal arbeida saman med nigerianarar, som etter kvart skal ta over drifta sjølv. To av nigerianarane var på opplæring på Mongstad i fem månader i fjor.
Det har vore ein del uro i Nigeria dei siste åra, men Krossøy fryktar ikkje det.
? Det skal vera rolegare der no. Dit me skal er det dessutan eit stort internasjonalt miljø knytt til oljeindustrien, seier han.

Beste teknologi
Også fleire frå Soilcare skal til Nigeria utover året. Men etter kvart når drifta kjem skikkeleg i gang der nede vert det berre snakk om service, dersom alt fungerer som planlagt. Teknologien til Soilcare har også vekt interesse andre stader i utlandet. Dei har blant anna hatt ei maskin i Brehmen. Kontrakten i Nigeria er det Hellenes A/S som har, og dei leiger inn maskin og mannskap frå Soilcare.
? Fleire oljeselskap har som mål å bruka den best tilgjengelege miljøteknologien. Difor har eg god tru på Soilcare, seier Krossøy, som og fortel at det kan verta aktuelt med aktivitet i fleire land i tida framover.