Til toppjobb i Bergen

– Dette er ein jobb midt i mi gate og som eg berre ikkje kunne seia nei til. Strategisk kommunikasjon er mitt fagfelt, seier Elin Folgerø Styve til Strilen.

Folgerø Styve er i dag dagleg leiar for Nordhordland Utviklingsselskap IKS, inntil nyleg Regionrådet Nordhordland, med kontorstad i Knarvik. Dette er ei stilling ho har hatt i halvanna år.

– At eg sluttar der, er absolutt ikkje uttrykk for at eg ikkje har likt meg. Tvert om, det vert tungt å slutta, men denne jobben måtte eg berre ta, seier ei smilande Folgerø Styve.

Universitet?
Som kommunikasjonsdirektør vil ho gå inn i toppleiinga for Høgskolen i Bergen. Høgskolen utdannar i dag både lærarar, sjukepleiarar, ingeniørar, fysioterapeutar, sosionomar og fleire yrkesgrupper. I dag er Høgskolen spreidd på mange ulike stader i Bergen, men i 2014 skal dei flytta inn i nye lokale på Kronstad.

– Høgskolen har også planar om å driva meir med forsking og vil søkja om status som universitetet, og det er også ein veldig spennande prosess å vera med på, seier Folgerø Styve.

Ho har tidlegare jobba med kommunikasjon både hos Norges Handelshøgskole og Universitetet i Bergen.

Jobba med unge
Folgerø Styve vil begynna i den nye jobben i midten av mars.

– Endå ein annan grunn til at eg sa ja til denne jobben, er at eg vil få jobba i eit miljø med mykje unge folk. Det er noko er trivst veldig godt med, seier ho.

Det var fleire kandidatar som kjempa om jobben, og ein har vore gjennom ein normal tilsetjingsprosess, seier ho.

Folgerø Styve er busett på Hjelmås og skal halda fram med det.

– No vert det kanskje å ta båten til byen, seier ho. Stillinga som ho no har, vil verta utlyst i næraste framtid.