Tilståing etter postbilranet

Dei to som har tilstått, har i sine forklaringar drege inn ein tredje mann, også han i tjueåra. Tredjemann har nekta for å vera involvert i ranet, men etter vitneforklaringar frå mellom andre postmannen og dei to ranarane som har tilstått, har retten kome fram til at det er skjellig grunn til mistanke også mot han.
Alle dei tre vart i Nordhordland tingrett torsdag varetektsfengsla for fire veker, fram til torsdag 7. desember.

Stal postbil
Det var måndag denne veka at postmannen vart overmanna medan var ute på runden. På Hestnes i 14.30-tida vart bilen stolen og postmannen måtte også gje frå seg mobiltelefonen.
Bilen vart funnen berre nokre timar seinare på Frekhaug, og tysdag ettermiddag greip så politiet dei tre mennene som no er varetektsfengsla.

Lite utbytte
Ifølgje Bergens Tidende skal dei tre mennene ha fått med seg 11.000 kroner frå bilen fordelt på kontantar og frimerke.
Dei skal ha hatt tankar om at postmannen ville ha med seg større summar, då dei trudde at alle trygdeutbetalingar vart gjort kontant frå postbilen. Slik er det ikkje, og i tillegg var det heller ikkje trygdeutbetaling måndag då dei stal postbilen.