Tiltalt for bildrap etter dødsulukke

? Det er ikkje foreldra som har bede om at det vert tatt ut tiltale. Dette er ei sjølvstendig vurdering som påtalemakta har gjort, seier politiadvokat Jan Grahl Madsen til Strilen.
Etter tiltalen hadde 22-åringen ein fart på heile 114 km/t då han kjørte på den 15 år gamle Meland-jenta. Ho vart kritisk skadd og døydde to dagar etterpå på Haukeland Universitetssjukehus.
? Farten er basert på målingar, blant anna av bremsespor, som er gjort av Statens vegvesen, seier Grahl Madsen.
22-åringen nektar straffeskuld. Han meiner sjølv at han ikkje hadde meir enn 70 km/t i 60-sona. Bilføraren sin advokat, Vegard Austgulen, seier til BA at ulukkesstaden ikkje var merka for kryssande trafikk, ettersom det berre er laga ein passasje i autovernet.
Den fatale ulukka skjedde ved 20-tida torsdag 20. oktober. 15-åringen var ute og sykla saman med ei jamnaldrande veninne, som vart lettare skadd.
Jenta som omkom var elev i 10. klasse ved Meland ungdomsskule, og ho hadde svært mange vener i det lokale ungdomsmiljøet, ikkje berre i Meland.
Saka skal opp i Nordhordland Tingrett 18. og 19. september. Retten skal også på synfaring.
? Slike saker endar ofte opp med ubetinga fengsel, seier politiadvokat Grahl Madsen. Tiltalen lyder i dette tilfelle på uaktsamt drap under særdeles skjerpande omstende, med ei strafferamme på inntil seks års fengsel.