Timesvis i telefonkø til Radøy legekontor

Måndag denne veka var Ragnhild Werøy involvert i ei mindre bilulukke. Etter hendinga var ho øm i nakken, og ville til lege for å få ein sjekk. Men det var ikkje så lett.

? Eg ringte til legekontoret heile måndag, utan hell, seier Ragnhild Werøy.

Legesjekken var også viktig med tanke på eventuelle seinskadar, dersom ho seinare skulle få problem med nakken.

? Eg ville til lege for å få dokumentert at det hadde skjedd noko.

Ein slik legesjekk er noko av det første forsikringsselskapa spør etter dersom det seinare skulle verta snakk om ei skadeutbetaling.

Tysdag to timar

Etter å ha ringt heile måndagen utan å koma gjennom måtte Werøy prøva att på telefonen tysdag. Etter to timar kom ho gjennom, og fekk då beskjed om at ho kunne koma til straks, eller få ein time om to-tre veker.

? Akkurat då var eg ikkje på Manger, og kunne ikkje koma med ein gong.

Løysinga for Werøy var å møta opp på legekontoret onsdag 08.00, og venta på dei akutt-timane som var til fordeling. Etter tre timars ventetid fekk ho då gjort unna legesjekken.

Ragnhild Werøy skryt av kort ventetid til vanleg legetime, og er oppteken av å få fram at ho ikkje er misnøgd med legekontoret i seg sjølv. Det ho reagerer på er at det er så vanskeleg å koma gjennom på telefonen.

? Systemet er for dårleg. Til dømes heiter det at ein må avbestilla legetimar seinast 24 timar før, men kva om ein ikkje kjem gjennom på telefonen? Eit eller anna må det vera mogleg å gjera, seier Werøy.

Ho viser også til at dei som ringer må betala dyrt for ventetida. Når ein ringer legekontoret kjem ein først inn på ein svarar som opplyser om nummeret til legevakta i Knarvik. Når ein så ventar vidare går teljarskritta.

? No ventar eg på mobilrekninga for desse to dagane, seier Ragnhild Werøy.

Oppe i eldrerådet

I eldrerådet i Radøy har telefonkøen ved legekontoret vore oppe som ei eiga sak. Under eventuelt-punktet på siste møte tok Vemund Gunnarson opp spørsmålet, etter at han hadde vorte kontakta om problemet.