To skadde i båtkollisjon

Ein mann er send til Sentralsjukehuset  Sogn og Fjordane i Førde med nakkeskade etter at fritidsbåten han var om bord i, kolliderte med eit oppdrettsanlegg tilhøyrande Firda Sjøfarmer aust for Bårøy i Gulen like etter midnatt i dag, tysdag. Bårøy ligg nord for Mjømna.
Ein annan mann som var om bord, vart behandla hos lege i Eivindvik, opplyser lensmann Henry Indrebø ved Gulen lensmannskontor til Strilen.

Nordover
Den om lag ni meter lange fritidsbåten var på veg nordover med to mann på 37 og 64 år om bord, då kollisjonen skjedde. Dei var på veg til Trøndelag.
? Årsaka til kollisjonen kjenner me ikkje, men det er ikkje mistanke om promille, seier Indrebø.
Båten har truleg ikkje hatt høg fart, sidan skadane på båten ikkje vart større.

Greidde å tetta
? Båten fekk skadar i baugen, men dei om bord greidde sjølve å tetta dette så pass at båten ikkje sokk, fortel lensmannen.
Båten fekk eit hol på 20 - 25 centimeter like under vasslinja.
Redningssentralen vart varsla, og redningsskøyta Utvær kom til og frakta dei skadde til Eivindvik.
Båtar frå oppdrettsanlegget slepa båten til slipp på Nyhamar på Hisarøy.
Etter det lensmannen kjenner til, skal oppdrettsanlegget ikkje har vorte påført skadar i samanstøyten.