To skadde i trafikkulukke

Ulukka skjedde då bilen for utfor vegen og hamna i eit tre. Både folk frå politiet og Statens vegvesen har tysdag føremiddag vore på staden for å undersøkja om der er spor som kan forklara ulukka. Det var ikkje andre bilar involverte.
For føraren er tilstanden «alvorleg og stabil». Han er operert for brotskadar og får intensivbehandling, heiter det i ei melding frå sjukehuset utsendt ved 11.20-tida tysdag.
Ein 18 år gammal gut som sat på, er lettare skadd. For han er tilstanden stabil, og han er tysdag overflytta til ortopedisk avdeling.

Tiltalt
Føraren av ulukkesbilen er den same som køyrde bilen på Hopeflaten i januar i fjor då ein 16 år gammal kamerat omkom. Saka vart då etterforska for høg fart, men vart lagd bort av Hordaland politidistrikt. Henlegginga vart klaga inn for Statsadvokaten i Hordaland av foreldra til 16-åringen som omkom. Statsadvokaten bestemte i desember i fjor at guten skulle tiltalast. Tiltalen går no ut på aktlaus køyring med døden til følge.
Ifølgje Bergens Tidende meinte politiet å kunna dokumentera at under ulukka i fjor, vart farten over 100 km/t i timen. Guten sjølv hevda at han ikkje hadde høg fart då ulukka skjedde.