Tøff omstilling på Mongstad

I 2010 hadde Statoil Mongstad eit underskot på svimlande 3,5 milliardar kroner. Ei vesentleg årsak til dette er at verdien av anlegget vart skriven ned med 2,9 milliardar kroner.

– Grunnen til denne nedskrivinga er at driftsmarginane har gått kraftig ned dei seinare år. Dermed er verdien av anlegget redusert, seier informasjonssjef Jon Halstein Tjore til Strilen.

Prisane på råvarene til raffineriet har gått opp, medan prisane på ferdige oljeprodukt ikkje har auka tilsvarande.

Halvert
–I høve dei gode åra fram til 2008 har driftsmarginane gått ned til det halve, seier Tjore.

Og utsiktene i marknaden til­seier ikkje noka snarleg forbetring i innteninga, med finanskrise og oppbygging av auka raffineringskapasitet andre stader i verda, mellom anna i Asia.

Men om mykje var negativt, kan likevel raffineriet gleda seg over at dei reine driftsunderskotet i 2010 er halvert i høve til 2009.

– I fjor var driftsunderskotet 657 millionar kroner, og i 2009 nesten det doble.

Samla driftsutgifter for raf­fi­ne­­riet i 2010 var 2,350 mil­li­ar­dar kroner.

Halv milliard
Raffineriet er pålagt å driva endå meir effektiv enn no.

– Me har eit forbetringsprogram, der målet å redusera driftskostnadene med ein halv milliard kroner fram til 2014. Det er klart at me no er inne i ein tøff periode, seier Tjore.

Men å stengja anlegget på Mongstad er ikkje aktuelt no, og det er heller ikkje planar om å seia opp fast tilsette, som no ligg rundt 800.

Mindre innleigd
Dei som først og fremst vil merka dei trongare tidene, er firma som sel varer og tenester til raffineriet.

– Det er noko som desse selskapa nok alt har merka, og som dei i tida framover vil merka endå meir, seier Tjore.

– Det er klart at me i den situasjonen me står i, må vurdera alle tiltak og utgifter nøye. Men det vil ikkje verta kutta i naudsynt vedlikehald.

Når det gjeld oppgraderingar, er situasjonen ein annan. Ein skal i næraste framtid ta stilling til om koksanlegget skal oppgraderast for ein halv milliard kroner eller ikkje.

Tøft før og
– Ein har vore gjennom tøffe periodar med store underskot på Mongstad før og. Takk vera dei tiltaka som då vart gjorde, fekk ein ta del i oppturen som kom etterpå, seier Tjore.

I ein tøff marknad er det viktig å driva så rasjonelt og kostnadseffektivt som mogeleg, og det vil vera fokuset på Mongstad framover.

Men sjølv om kranane vert skrudde til på Mongstad, reknar ikkje Tjore med at dei vil ha behov for færre lærlingar. Statoil Mongstad er ei viktig lærlingbedrift, som årleg tek inn 35 lærlingar.

– Med auka konkurranse er det desto viktigare at me klarar å rekruttera dei beste folka, påpeikar Tjore.