Tøffe krav til vindmøller

Høgda på eventuelle vindmøller på Setenesfjellet kan verta eit stridstema. Det er klart etter at Brandangersundet Interessegruppe i eit innspel til reguleringsplanen for området, krev at ingen vindmøller, rotorblad medrekna, må vera høgare enn 125 meter. Dette fordi ein ikkje ønskjer for dominerande innslag i landskapet.
I planane som Fred. Olsen Renewables as har operert med å langt, har det vore snakk om vindmøller på 200 meter. Det er planlagt cirka 20 vindmøller.
Ikkje på toppane
Interessegruppa, som representerer lokale grunneigarar, vil heller ikkje ha vindmøller kor som helst. Dert må ikkje plasserast vindmøller rundt toppane på Veten og Storefjellet, er kravet.
Vindmøllene må plasserst nordaust i planområdet, og slik i landskapet at det vert minst mogeleg skjemmande.
Interessegruppa vil heller ikkje ha vindmøller i nedslagsfeltet til Brandangersund vassverk.
Gruppa krev og at eventuelle støyplager må dokumenterast svært nøye før konsesjon vert gjeven.

Ny veg
Eit anna krav er at det vert bygd ny veg inn i området frå Fivelsdal, langs austsida av Fivelsdalsvatnet og austsida av Sellevågvatnet. Denne løysinga kjem i staden for utvidingar av eksisterande veg, som interessegruppa meiner vil føra til store ulemper for folk i nærområdet i anleggsperioden. Den nye vegen må gjerast offentleg tilgjengeleg når anlegget er ferdig, vert det sagt.
Ein stiller seg heilt negativ til at det vert bygd ny kai i Brandanger og veg derifrå, og at vindmøllene skal fraktast den vegen opp i fjellet. Dette vil vera svært øydeleggjande for kulturlandskapet, vert det påpeika.
Fristen for å koma med uttale til planen gjekk ut 17. juni.