Tog på Kaland og Byrknesøy

– Kring 150 deltok etter at melding gjekk ut på Facebook, opplyser Helge Dyrkolbotn i Austrheim kommune.

Initiativtakarar var Caritha Stueland Sigvathsen og Lisa Maria Kopperdal.

Dermed vart det og eit tilbod om å markera på denne måten for dei som syntest at det vart for langt å reisa til Bergen.

Austrheim kyrkje vert open tysdag, onsdag og torsdag på kveldstid i samband med den nasjonale tragedien, mellom klokka 20.30 og 21.30.

På Byrknesøy gjekk toget frå landhandleriet via Nesevågen til skulen. Der sa rektor Helge Pedersen nokre ord til minne for offera etter terroraksjonane i Oslo og på Utøya.

– Etterpå kunne folk leggja ned blomar og tenna lys ved minnestøtta for dei omkomne frå 2. verdskrig. Det vart ei fin og verdig markering, opplyser Susanne Fonnes Larsen i ein e-post til Strilen.