Tok 5000-meter som oppvarming

Færø var naturleg nok godt nøgd med sigeren på 5000 meteren, der han kom i mål med god margin føre nestemann.
? Det gjekk fint. Eg starta rolig og tok ikkje ut alt eg hadde, seier ungguten til Strilen like etter løpet.
Han hadde knapt tid til å feira sigeren før han skunda seg i veg for å spela kamp med Eikanger sitt gutelag.
? No skal eg berre ein snartur heimom for å få i meg litt mat. Kampen startar om halvannan time, seier han og kikkar kjapt på klokka.
Eikanger-gutane spelar i Gutar elite haust, og heimekampen mot Fana søndag enda 4-4. Halfdan Emil kom innpå etter om lag eit kvarter av første omgang, og spelte resten av kampen.
15-åringen frå Eikanger er ein travel kar. Han trenar kvar dag og driv med både friidrett, fotball og ski.
? Det vert ikkje så mykje skigåing no. Eg kjem nok til å satsa mest på friidretten. Det er veldig kjekt. Eg har begynt å trena litt i Knarvik i lag med løparar frå Aks-77. Eg likar utfordringa, seier han.

Spreke søsken
Halfdan-Emil Færø har mykje sprekt blod i årene. Mest heile familien hans driv med friidrett. Sjølv yngstemann Magnus Johan på 10 år er med på løp. Han var yngste deltakar i Eikangerløpet, sprang for fjerde år på rad, og forbetra persen med kring tre minutt frå i fjor.
Den lyse ungguten let seg slett ikkje skremma av at mesteparten av løparane høyrer heime i veteranklassen. Magnus sprang ved sidan av faren og hadde ingen problem med å gjennomføra 17 rundar rundt bana på Ostereidet.
? Det var litt tungt. Spesielt då me kom halvvegs, men det gjekk heilt fint, seier Magnus.
Han fortel at også han driv med fotball og ski i tillegg til friidrett.
? Det er kjekt å springa, men det er endå kjekkare å spela fotball, seier han og smiler breitt.

Tretten med
I alt 13 løparar stilte til start i årets Eikangerløp. Bjørnar Eidsheim gjekk hardt ut frå start og la seg i tet, tett følgd av Halfdan-Emil Færø og Atle Rød. Halfdan-Emil Færø tok over leiinga midtvegs i løpet og auka forspranget jamt og trutt. Dei to siste rundane hala Atle Rød innpå. Rød kom til slutt inn på ei tid tre sekund raskare enn i fjor.
Men ingen klarte å hamla opp med den unge Eikangerløparen. Færø vart klokka inn på tida 18,05 med Atle Rød som ein god nummer to på tida 18,39. Tredjeplass gjekk til Jan Ove Sagstad på tida 18,50.
Gunnar Gaulen (65) noterte seg også for ei sterk tid, han kom inn på 19,04.
Einar Færø fekk premie for 10. start og Jan Ove Sagstad for 5. start i Eikangerløpet.