Tok salven i eiga hand

– Eg hadde ikkje drøymt om at det skulle smella slik, og eg beklagar sterkt dersom nokon vart redde, seier Nils Markus Bakke.

Ville få det vekk

Den 36 år gamle sauebonden og brannmannen frå Fjellanger, fortel at han fann dynamitten då han og ein kamerat rydda i løa søndag kveld.

– Det har sikkert lagt her etter bestefaren min.

Dynamitten hadde begynt å bli blaut, og med fire ungar på garden, var einaste tanken å få det langt vekk her ifrå så fort som mogleg, seier han.

At han ikkje har C-sertifikat* lenger, fekk så vera, for han kunne berre ikkje la det liggja, forklarer han.

Å frakta det til lensmannskontoret i Knarvik meinte dei ville vera for risikabelt.

Difor pakka dei heile sulamitten inn i ein varmekjeledress og kjørte til steinbrotet sørom Lyngfjelltunnelen på Lindås for å detonerte det der.

Reine atombomba

At klokka var over halv tolv søndag kveld, tenkte dei ikkje på, for dei trudde ikkje smellen kom til å bli så kraftig. Men der tok dei feil.

– Det small kollossalt og gul røyk og mold spreidde seg som reine atombomba, seier «Dynamitt-Nils», som ikkje legg skjul på at det var litt moro også.

At salven fekk hus i fleire kilometer omkrins til å rista og vindauge til å klirra, og at drønnet kunne høyrast i halve Lindås, visste ikkje Nils Markus der og då.

Men han forstod at smellet var så kraftig at det kunne vera lurt å varsla politiet. Og det gjorde han nok rett i, for han var ikkje den første som ringte, har Strilen fått vita i ettertid.

Reaksjonane hagla

Den første direkte reaksjonen på smellen fekk han frå dei som driv Vågseidestranda feriesenter.

– Dei hadde rista skikkeleg, så eg fann ut at det var best å skriva på Facebook at det var eg som stod bak smellen i tilfelle fleire lurte på kva det var, seier han.

Og det var det – langt fleire enn dei han er ven med på Facebook.

På Skauge var drønnet så sterkt at vindaugsrutene klirra og huset rista, stod det å lesa Facebook.

Déjà vu

Andre som fekk rista seg skikkeleg, var hyttenaboen, Kari Bakke på Vågseidet.

Ho hoppa i stolen då det small, fortalte ho til Strilen då ho tysdag ringte for å be om hjelp til å finna ut kva som skjedde.

– Det small skikkeleg og heile huset rista. Det var tydeleg at eksplosjonen gjekk i grunnen, seier ho.

Bakke fortel at smellet gjekk kaldt nedover ryggen på henne fordi ho framleis har støkk i seg etter eit liknande drønn ein laurdags føremiddag i 1954.

Då miste to gutar i 15-16-årsalderen livet då eit grøftedynamittlager gjekk i lufta.

Gløymer det aldri

– Det var heilt forferdeleg og gjorde eit vanvittig inntrykk. Det er mange på min alder som hugsar det, seier ho.

Det var då dei to bygutane dreiv og leika i skogen i Fjellangermarka at ulukka skjedde.

Bakke fortel at ein veit ikkje sikkert kva som skjedde.

Men gutane hadde luftgevær med seg og ein trur dei må ha sendt ei luftgeværkule inn i torvhuset der jordstyret hadde plassert grøftedynamitt.

– Jordstyret trudde nok det var trygt å lagra grøftedynamitten langt der ute i utmarka, seier ho.

I beste meining

Nils Markus fortel at han kjenner til episoden Kari Bakke fortel om.

– Det var faktisk på min eigedom det skjedde og det er hol etter det enno, seier han.

Som trøst til hyttenaboen legg han til at det han gjorde søndag kveld, var gjort i beste meining og at han ikkje kan anna enn å beklaga at han skremde henne.

Om episoden vil få noko etterspel, har ikkje politiet teke stilling til.

– Me vil sjølvsagt undersøkja saka, så får me ta det derifrå, seier politioverbetjent Kjell-Idar Vangberg ved Nordhordland lensmannsdistrikt.

 --------------------------

 * Frå sommaren 2009 vart det slutt på ordninga som gav bønder lov å gjennomføra mindre sprengingsarbeid på eigen jord- og skogbrukseigedom.