Tok sin fjerde strake NM-siger

Manger Skulemusikklag har vore dominerande i noregseliten for skulekorps dei siste åra, og har heva seg ytterlegare i år. Framføringa deira laurdag tok pusten frå publikum, og ein måtte nesten gni seg i augo for å vera sikker på at musikken på scena faktisk vart spelt av eit skulekorps.

Mest sannsynleg hadde dette korpset hevda seg godt eit stykke oppe i divisjonane dersom dei hadde stillt til NM for vaksne korps. Det gledelege i år er at også Knarvik Skulekorps har teke eit stort sprang framover, og nærmar seg stadig Manger i kvalitet. Det var slett ikkje lett for publikum å avgjera kven som ville ta NM-tittelen i år etter at dei to korpsa hadde spelt. Manger vann med 97 poeng, to poeng framfor Knarvik. Deretter var det fire poeng ned til Smørås skolemusikk på 3. plass. Skodvin Skulemusikk har og vore blant dei beste korpsa i landet lenge, og tok ein fin 4. plass med 89 poeng laurdag.

? Full klaff
? Me var veldig nøgde med spelinga. Det var full klaff, seier Manger sin dirigent, Rune Hannisdal.
Korpset spelte det krevjande stykket Prims, Symphonic Study No. 2 for Brass Band av Peter Graham.
Hannisdal fortel at korpset er nesten identisk med det som vann NM i fjor, og det var svært få som gjekk av for aldersgrensa i fjor. Dermed er dei fleste musikantane eitt år eldre, og korpset har heva seg. Til hausten er det litt fleire som går av for aldersgrensa, men Hannisdal uroar seg ikkje for det.
? Det kjem stadig nye flinke til, og det står klar folk til å ta over stemmene til dei som sluttar, seier han.

Øving er nøkkelen
Dersom publikum hadde bind for augo, er det ikkje mange som hadde tippa at dei som spelte var eit skulekorps. Hannisdal fortel at dommarane også påpeika dette.
? Dei skriv at korpset har ein veldig vaksen klang, fortel dirigenten.
Han synest og det er fint at Knarvik no kjem for fullt.
? Det er berre kjekt at det er korps som pustar oss i nakken. Det gjer at me må skjerpa oss heile tida. At dette er eit nabokorps er ekstra kjekt, seier han.
? Kva er årsaka til suksessen?
? Mange er flinke til å øva heime. Det finst ingen annan snarveg til å verta god å spela, seier Hannisdal.
Han er og imponert over måten musikantane hans yter sitt aller beste når det verkeleg gjeld.
Laget har spelt inn ein CD i vår, og til hausten vert det CD-slepp.
? Det gler eg meg veldig til, seier dirigenten.
Mottaking på Manger
Då korpset kom heim til Manger søndag kveld, vart dei møtt og hylla av foreldre, søsken og andre. Blant mottakskomiteen var kulturkonsulent Rune Rydland, som stillte for ordføraren som var vekkreist.
? Manger Skulemusikklag har teke sitt fjerde strake NM og vunne heile ti meisterskap til saman. Det er kommunen veldig kry av, sa Rydland, som lova at kommunen kom tilbake med ei skikkeleg gåve til noregsmeistrane.


Her er resultata
?    1. divisjon
1.    Manger Skulemusikklag, 97
2.    Knarvik skulekorps, 95
3.    Smørås Skolemusikk, 91
4.    Skodvin Skulemusikk, 90
5.    Krohnengen Skoles Musikkorps, 89
6.    Tasta Skolekorps, 87
7.    Damsgård/Kjøkkelvik Skoles Musikkorps, 84

?    2. divisjon
1.    Tertnes Skoles Musikkorps, 98
2.    Kløvheim Skulekorps, 93
3.    Brøttum Skolekorps, 92
4.    Brekke Skulemusikkorps, 90
5.    Sæbø Skulemusikklag, 89
6.    Sandnes Skulekorps, 88
7.    Felleskorpset Hanøy Haugland Tveit, 86
7.    Tananger Skolekorps, 86

?    3. divisjon:
1.    Kleppestø/Florvåg Skolekorps, 95
2.    Tysnes Skulekorps, 93
3.    Søreide og Sandsli Skolekorps, 92
4.    Frøyland Skolekorps, 91
4.    Dalsøyra og Nordbygda skulekorps, 91
6.    Træet Skolemusikkorps, 90
6.    Moster Skulekorps, 90
8.    Figgjo Skolekorps, 89
9.    Rossland Skulekorps, 88
10.    Hordabø Skulemusikklag, 87
11.    Sotra vest Skulekorps, 86
12.    Hellen Skoles Musikkorps, 85
13.    Ostereiet Skulemusikk, 84
14.    Ulveseth Skulkorps, 83
15.    Spydeberg Skolekorps, 81