Tømminga av Server i gang

? Målet er å få tømt skipet før påske, seier aksjonsleiar Tom Hansen i Kystverket.
Kor mykje tungolje det havarerte skipet inneheld, er det ingen som veit. Men reint teoretisk skal der vera olje att i tankane i maskinrommet, meiner Hansen.
Jobben med å finna ut dette pluss å tømma skipet er det Frank Mohn Flatøy, som skal gjera. Og dei er no i full gang med å få på plass utstyr til både søkjing, borring og fjerning av eventuell olje. I tillegg har dei sjølvsagt høg oljevernberedskap både på land og i sjøen for å hindra ytterlegare oljesøl.
? I dette fine veret kjem det til å gå heilt greitt, men me må jo alltid vera på den sikre sida, seier Erik Gloppen, som er prosjektleiar på land for Frank Mohn Flatøy.
Han fortel at dei har peila skipet etter alle kunstens reglar og veit akkurat kor dei skal leita etter olje. Med det uveret som var i tida etter forliset er det umogleg å seia om olja vart spylt på sjøen eller om der er noko att, seier han. Er der olje att, fjernar dei olja ved å bora små hol i tanken og suga olja ut, fortel han.
Arbeidet skal føregå frå arbeidsferja Flekkerøy, og i alt ti personar frå Frank Mohn skal delta i arbeidet.

Forhåpentlegvis friskmeldt
Kor vidt Fedje snart kan friskmeldast etter forliset, skal avgjerast like over påske. Då skal rådmann Vidar Bråthen ha med seg Kystverket og Interkommunalt Utval for Akuttforureining (IUA) på synfaring i alle kre og krokar på heile øya.
? Eg hadde meg ein tur i Fyrsundet søndag og der ser det takka vera ein kjempeinnsats veldig bra ut. Men eg har ikkje ikkje vore ute i øyane og i alle dei andre vikane på øya i det siste, seier han.

Vrakfjerning før hausten
Fjerning av sjølve akterskipet til «M/S Server» skal ifølgje Kystverket skje før hauststormane set inn. Kven som skal gjera den jobben, er ikkje bestemt.