Tre skadd på Flatøy

Det var to personbilar, ein Jeep og ein Audi, som kolliderte på strekninga mellom betongblandeverket og bomstasjonen ved 18.00-tida.
Ei kvinne midt i 20-åra kom seg ut or Jeepen ved eiga hjelp og var berre lettare skadd. I Audien sat det ein far og ein son, og faren måtte skjerast laus, opplyser Christian Hilland ved Lindås og Meland lensmannskontor torsdag morgon. Han seier at mannen var skoren laus kring 25 minuttar etter at ulukka var rapportert.
Alle tre som var involvert i ulukka, vart sende til Haukeland universitetssjukehus med ambulanse.
Politiet har så langt ikkje snakka med førarane av dei to bilane. Difor kan verken Hilland eller lensmann Einar Vatne førebels uttala seg om korleis ulukka skjedde.
Torsdag ettermiddag ved 14.00-tida opplyser lensmann Vatne at dei tre skadde framleis er på sjukehus.
Det er mannen, som er midt i 30-åra, som er alvorlegast skadd, med ein del brotskadar. Han er framleis i respirator, opplyser lensmann Einar Vatne. Også sonen på åtte år har fått brotskadar.
- Det var ein kraftig smell, men ikkje noko tyder på fart utanom det vanlege. Men det var svært glatt på staden der kollisjonen skjedde, seier Einar Vatne.
Både legehelikopter, fleire ambulansar og mannskap frå Lindås og Meland brannvern rykka ut til ulukka i tillegg til politiet.
Ulukka førte etter kvart til lange køar i begge retningar. Trafikken tok til å løysa seg opp ved 19.00-tida.