Treng redningsbil på E39

E 39 gjennom Masfjorden og Gulen har stadig aukande trafikk. Dette er og ei strekning med mange og lange tunnelar. Faren for alvorlege ulukker inne i tunnelane er stor, meiner kommuneleiinga i Masfjorden og Gulen.

? Me kan til dømes få situasjonar der folk sit fastklemde i bilar, og der ein rask redningsaksjon kan vera forskjellen mellom liv og død, seier rådmann Lovisa Midtbø i Masfjorden til Strilen.

Redningsbil

Difor ønskjer dei to kommunane i fellesskap å gå til innkjøp av ein liten, men rask, redningsbil med naudsynt utstyr som kan rykkja ut på kort varsel når ulukka er ute. Men dette kostar pengar, ganske mykje pengar. Difor har dei to kommunane no sendt ein søknad til Statens vegvesen region Vest der dei ber om eit tilskot på ein million kroner.

Frivillige

? Situasjonen hjå oss er annleis enn til dømes i Lindås der dei har eit profesjonelt brannkorps med folk på vakt heile tida, påpeikar Midtbø.

I dei to kommunane er det berre frivillige mannskap som må tilkallast når ulukke er ute.

? Me tenkjer oss at redningsbilen skal kunna vera raskt på plassen, og at folka i den kan starta redningsarbeid før andre hjelpemannskap frå brannvesen og ambulanse kjem til, seier rådmannen.

Analyse

Det er arbeidet med ein risiko- og sårbarheitsanalyse i samband med revisjon av brannordninga som har konkludert med at det trengst ein eigen redningsbil i dei to kommunane.

? Og han kan sjølvsagt rykkja ut ved ulukker i nabokommuane, som Høyanger, Modalen og Lindås og, seier Midtbø.