Truga politi med balltre

Balltreet vart henta fram då politiet i desember i fjor gjennomførte ei ransaking der mannen budde. Politiet skulle ta med seg nokre beslaglagde gjenstandar. Då byrja mannen å truga tre politibetjentar med at han skulle ta dei, og ein av betjentane vart kalla «idiot» og «rottefjes». Han hadde balltreet i hendene då han gjekk mot politibetjentane, og kasta det først frå seg då politiet hadde tatt fram batongar og pepperspray.
I samband med denne ransakinga ringte mannen til ein annan mann, og truga med å banka han opp. Men politiet høyrde kva han sa, og mannen vart difor dømt for trugsmåla. Under den same ransakinga fann politiet meir enn 100 gram hasj og nesten tretti Rohypnol-tablettar. Også ved eit anna høve fann politiet hasj hjå mannen, og han er også dømt for å ha brukt hasj fleire gonger.
Nokre veker før ransakinga slo han ein annan mann to gonger i ansiktet, og sparka han i skrittet.
I samband med dette knuste han ei rute i ein bustad, ved å kasta ein steinpyntegjenstand på 20-30 kilo gjennom vindauget.
I februar i fjor haldt mannen på å køyra på to fotgjengarar på Erstad i Meland. Like etter køyrde han av vegen og smadra eit busskur. Han og ein kamerat som var passasjer, stakk frå staden. Politiet fann mannen fleire timar seinare, og blodprøven då viste 1,2 i promille. I fjor haust køyrde han igjen i fylla, og då på tre hjul. Med 1,5 i promille køyrde han bil på motorvegen i Åsane sjølv om høgre framhjul mangla. Mindre enn ei veke etterpå krasja han igjen i fylla. Ved Herlandstunnelen i Lindås kom han over i feil køyrebane og krasja med ein annan bil. Han var då rusa på fleire ulike stoff.
Mannen er dessutan dømt for å ha køyrd bil ved sju ulike høve utan å ha førarkort. Han har og vore ute og køyrd båt i rusa tilstand. I fjor sommar køyrde han ein rask skjergardsjeep ved Håøy i Meland. Ein politibåt på patrulje tykte mannen køyrde med unaturleg krappe svingar og fart, og stogga båten.
Mannen hevda å vera uskuldig i dei fleste tiltalepunkta. Men dette trudde ikkje Nordhordland Tingrett på. Det einaste han ikkje vart dømt for, var å oppbevara 9 mm-ammunisjon utan løyve. Mannen hevda at han hadde tatt ammunisjonen frå ein kamerat, av di han frykta at kameraten kom til å bruka den. Retten meinte difor at oppbevaringa av ammunisjonen då var naudrett.
Mannen vart i vår dømt til ti månaders fengsel for dei ulike brotsverka. Han må og søkja særskilt om det dersom han nokon gong skal få førarkortet att.