Trugar med høgare bøter

På ein godt synleg stad i Fedje sentrum ligg eit halvferdig hus med stillas og presenningar på taket. Slik har det i alle fall stått sidan 2000, då Kaland Trelast AS i Austrheim avslutta bygginga. Kommunen har lenge sett seg leie på at huset står der halvferdig, og i 2003 sende dei første varsel om dagbøter. Dette vedtaket vart klaga inn til Fylkesmannen, men klagen vart avslegen.

200 kroner dagen
Frå august 2004 har Kaland Trelast som ansvarshavande for bygget betalt bøter. I starten var bøtene på 100 kroner dagen, frå 1. januar 2006 200 kroner. Hittil er det dermed kravd inn over 90.000 kroner.

Får pengane
? Dagbøtene vert betalte. Det er ikkje det som er problemet. Me vil ha huset ferdig. Det er skjemmande slik det står, midt i bygda, seier teknisk sjef Øyvind Tolleshaug til Strilen. Difor har ein no sendt ut melding om at viss ikkje noko skjer, vil bøtene verta auka til 500 kroner dagen frå nyttår.
Kaland Trelast har frist til 20. august med å svara.
? Kravet går til Kaland Trelast, som ansvarshavande for bygget, men slik eg forstår, er det byggherren som betalar bøtene, seier Tolleshaug.

Lang prosess
Eigaren av tomta overtok henne i 1987. Rundt 1990 kom der opp grunnmur, men så skjedde lite i fleire år, før råbygget kom opp i 2000.
? I mellomtida har eigaren kjøpt seg eit anna hus, så han har kanskje ikkje så stort behov for huset lenger, seier Tolleshaug.
Men uansett ønskjer ikkje kommunen at huset skal stå slik det gjer no.
Strilen har også vore i kontakt med eigaren, som ikkje ønskjer å kommentera saka ut over at han trur ho skal få si løysing om ikkje så lenge.