Truleg fleirtal i kommunestyret for skule-tilrådinga

Per kl. 09.30 torsdag ser situasjonen slik ut etter ein runde til partigruppene:
Ap vil i hovudtrekk stå på formannskapet si tilråding. Partiet står fast på å bruka pengar på å utvida Knarvik ungdomsskule og Leiknes barneskule. Men for ein mindre sum som vert til overs av ramma på 69 millionar, kan partiet koma til å føreslå at den går til oppstart med å utvida Knarvik barneskule framfor at midlane går til Ostereidet ungdomsskule.
I Høgre ser det ut til å verta 3-1 for ny skule i Alversund.
? Det ser ut til at Torunn Gamst står på tilrådinga i formannskapet. Resten av gruppa på 3 støttar truleg å bevara ein ungdomsskule i Alversund. Eg jobbar med eit framlegg om at rådmannen vert beden om å utgreia ei sak om det skal byggjast ny barne- eller ungdomsskule i Alversund. Det heng litt saman med tilgjengeleg tomt kva ein bør satsa på. Men Høgre-fleirtalet vil ha oppdeling i 1-7 og 8-10 skule i Alversund, seier Audun Stusdal.
Etter signal frå formannskapsmedlem Svein Børtveit, tyder alt på at KrF står på formannskapet si tilråding om flytting av ungdomsskuleelevar frå Alversund til Knarvik. Men gruppa er delt i synet på om Leiknes-elevane skal til Knarvik eller Ostereidet ungdomsskule.
? Eg går ut frå at Sp-gruppa på fem vil stå samla bak fleirtals-tilrådinga frå formannskapet, seier gruppeleiar Atle Austrheim. Men han seier at «det kan skje ting i møtet». Austrheim tenkjer då på at det kan vera delte meiningar om ein post på 12-15 milionar kroner skal brukast til opprusting på Ostereidet ungdomsskule eller til utviding av Knarvik barneskule.
I følgje Øystein Moldeklev i Frp, vil hans gruppe på sju først støtta eit eige framlegg frå Bjarte Vatnøy, men så falla ned på fleirtalet i formannskapet.
Dei to frå SV støttar i hovudtrekk fleirtalet i Høgre. ? Utgangspunktet er at Alversund må få ny ungdomsskule. Elevane derfrå kan overførast mellombels til ei brakkeløysing i Knarvik, og den bør helst på plass alt frå komande haust, seier Tore Svendsen.
Stiller Åshild Halland for Venstre, vil ho etter alt å døma stå på fleirtalet si tilråding frå formannskapet.
Møtet i kommunestyret er på Knarvik sjukeheim og startar kl. 14.00 torsdag.