Truleg slutt for Miljøkortet

I eitt år har reisande mellom Bergen og Knarvik/Frekhaug kunna gleda seg over ein spesiell rabatt på månadskortet, kalla miljøkort. Prisen har vore 630 kroner, og grunngjevinga for rabatten var å få fleire til å ta bussen då bompengane vart borte.
Frå nyttår er truleg spesialordninga borte. I fylkesrådmannen sitt budsjett vert ordninga fjerna. I staden vert prisen på alle periodekort i fylket sett ned med ti prosent utanom Bergen. Og Nordhordlandsbrua skal ikkje lenger utgjera eiga takstsone.

Prishopp
For reisande mellom Bergen og Knarvik/Frekhaug vil endringane føra til eit prishopp på 225 kroner i månaden i høve til miljøkortet. Prisen vert 855 kroner. Prisen før miljøkortet vart innførd, var 1050 kroner pr. månad.
At sona på brua vert fjerna, fører til at prisen på enkeltbillett Bergen - Knarvik vert sett ned frå 55 til 46 kroner.
Når det gjeld billettar på båt og buss generelt, legg budsjettet opp til takstfrys også i 2007.

Styrking
? Budsjettet inneber ei styrking på kollektivtrafikken, i og med at satsane på periodekort vert sett ned, seier Grethe Lunde frå Radøy, som sit i fylkestinget for Kristeleg Folkeparti.
Ho var ein av dei fremste forkjemparane for innføringa av miljøkortet i Nordhordland, men trur ikkje det vert aktuelt å kjempa vidare for det.
? Det som no ligg i budsjettet, er meir rettferdig for alle, seier ho.

Pengar til
ny skule
LINDÅS: Pengar til nybygg på Knarvik vidaregåande skule er den store posten i Nordhordland i fylkesbudsjettet for neste år. I 2007 ligg bygget inne med 34 millionar kroner. Totalt skal bygget kosta 92 millionar og stå ferdig i 2009.

Kraftig auke i
kraftinntekter
Fylkeskommunen disponerer ein del av konsesjonskraftinntektene i fylket. Dei seinare åra har desse inntektene utgjort om lag 50 millionar kroner, men på grunn av høgare kraftpris budsjetterer fylkesrådmannen med 100 millionar kroner i 2007. Mykje av desse inntektene stammar frå kraftanlegg i Nordhordland. Politikarar i Masfjorden meiner mellom anna at dei kan gå til å finansiera bru over Masfjorden.

Lyngheisenteret
inn i sekkepost
LINDÅS: Lyngheisenteret på Lygra får i år eit driftstilskot frå Hordaland fylkeskommune på 1,7 millionar kroner. No er senteret trekt inn som ein del av Museumssenteret i Salhus. Dermed er det ikkje oppført med ein eigen post i fylkesrådmannen sitt budsjett for 2007. Men løyvinga til museumssenteret er auka frå 1,8 til 5,4 millionar kroner i 2007. Driftstilskotet til Lyngheisenteret ligg inne i denne summen.

Mindre til
folkehøgskule
RADØY: Manger folkehøgskule må greia seg med mindre overføringar frå fylkeskommunen i 2007. I fylkesrådmannen sitt budsjett er driftstilskotet sett til 200.000 kroner. I inneverande år er tilskotet 650.000 kroner. Innverknad på neste års budsjett har det at ei vaktmeisterstilling er overført til ein annan post.