Trur på utvikling på Mongstad

Bygginga av gasskraftverk og framføring av gassleidning kan føra med seg ei ny, storstilt industriutvikling i Mongstadområdet. Det meiner Partnarskap Mongstad, som hadde sitt første møte i går.
Det er fylkeskommunen som har teke initiativ til dette nye organet, som er samansett av fylkeskommunen, aktuelle kommunar, Regionrådet for Nordhordland, Innovasjon Noreg og Hordaland olje og gass.

CO2-senter
? Me må gripa denne sjansen til industrivekst, seier fylkesordførar Torill Selsvold Nyborg i ei pressemelding etter møtet i går.
Særleg er det viktig å gjera Mongstad til eit nasjonalt senter for CO2-reinsing. Viss det går som fylkesordføraren håpar, kan dette også verta eit senter som spelar ei rolle internasjonalt når det gjeld å utvikla teknologi for reinsing av CO2 og lagring av denne klimagassen.
Også framtidig utnytting av naturgass i Nordhordlandsregionen skapar interessante utsikter når det gjeld industrireising, meiner fylkesordføraren.

Studie
På møtet i går vart det vedteke at ein skal få laga ein studie som viser kva grunnlag det er for utvikling, nyskaping og vekst i Mongstadområdet. Denne studien skal vera klar i februar neste år.
Når denne studien er klar, vil ein bestemma nærare korleis partnarskapen skal organiserast og utviklast vidare.