Trur tverrsamband kan setja fart på Meland

– All vekst i Meland skjer i Frekhaugområdet. Får me eit tverrsamband over nordre Holsnøy, opnar det seg store mogelegheiter for næringsutvikling der, seier Sigmund Larsen til Strilen.
Larsen er Framstegspartiet sin ordførarkandidat i Meland.
Tysdag deltok han i ein båttur der planane om eit tverrsamband frå nordre Askøy over Meland til Radøy vart presentert for partiet sin stortingsrepresentant Ketil Solvik-Olsen. Skippar på båten var Kjell Kristensen frå Herdla. Han er eldsjela bak ideen om eit vegsamband frå Askøy til Radøy, som kan knyta saman Sotra og Askøy med Nordhordland utan å måtta gå om Bergen.

Næringsområde
– Eg prøver å få inn eit næringsområde på Landsvik i Meland kommune sin kommuneplan, seier Larsen entusiastisk.
Han meiner at viss ein får tverrsamband, vil eit slikt næringsområde verta svært attraktivt, med kort avstand både til veg og sjø.
– Her kan ein få eit 1.500 dekar stort næringsområde med fire kilometer lang strandlinje for kaiutbygging, seier Larsen.
Eit næringsområde plassert midt mellom Mongstad, Hanøytangen, Ågotnes og Kollsnes/Stura trur han vil kunna trekkja til seg aktivitet.

Selja inn
I tillegg vil eit tverrsamband gjera nordre Holsnøy langt meir aktuelt som bustadområde, meiner Larsen, som lovar å fremja saka i valkampen.
– Eg trur ikkje fordelane med dette vegprosjektet heilt har gått opp for folk flest enno. Det har liksom vore noko som politikarane snakkar om, seier Larsen, men lovar å gjera sitt for å «selja det inn».

Mange fordelar
– Dette tverrsambandet er blant dei mest økonomisk prosjekta her i landet, og det vil kosta berre tredjedelen av Nyborgtunnelen, seier Kjell Kristensen.
Han har laga utrekningar som viser at sambandet kan byggjast for 835 millionar kroner.
– Eit slikt samband vil ha svært mykje å seia for næringsutviklinga i distriktet. Det er her verdiskapinga skjer, seier Kristensen.
Og viss ein kan køyra frå Sotra/Øygarden til Nordhordland utan å køyra gjennom Bergen, vil ein også avlasta vegsystemet i byen og minska ureininga frå vegtrafikken der, noko som ikkje minst vart aktualisert i vinter.

Kristensen meiner og at viss dette vegprosjektet vert skunda fram i tid, kan den planlagde kraftlinja frå Mongstad til Kollsnes leggjast langs denne vegen. Dermed vil ein kunna spara store summar og løysa eit miljøproblem i Radøy.
–Men skal det vera aktuelt, må denne vegen koma ganske snart, for kraftlinja er planlagd bygd om ikkje så mange år?
– Her står det berre på den politiske viljen, seier Kristensen.