Tveiten slepp til i Austmarka

? Området er ferdig regulert, så eg trur ikkje eg legg opp til å endra planen, seier ein godt nøgd Tveiten etter det positive vedtaket i formannskapet.
Men Tveiten er også så realistisk at han ser for seg ein stor porsjon arbeid for å få realisert prosjektet. Utbygginga skal skje gjennom selskapet Austmarka Øvre A/S, som er under skiping.
Kommunen har normalt satsa på å selja ein og ein tomt. Tveiten sin resept er å skaffa nok kjøparar til å byggja ut feltet i ein ein-gong.

Småhus
I planen kommunen har fått, vil Tveiten først og fremst retta seg mot førstegongstablerarar og andre som etterspør mindre husvære.
? No er det berre opp til meg sjølv og dei som vert med på prosjektet. Nokre trur kanskje at det berre er å få tak i rimelege tomter og selja dyre hus. Så enkelt er det nok ikkje. Men får eg til full utbygging, håpar eg å sitja att med nokre kroner, seier Tveiten.
Han trur 60 prosent av bustadene må vera selde før selskapet set spaden i jorda.
? Planen er å starta marknadsføring og sal av bustader før sommaren, seier Tveiten.
Dei som uttalte seg i formannskapet, sa seg positive til at den lokale forretningsmannen vil satsa der kommunen sjølv ikkje har kome i gang eller fått andre interessentar.
Det var og full semje om at ordføraren får fullmakt til å underteikna ein avtale med Tveiten. Fleire peika på at avtalen også må sikra kommunen sine interesser om ikkje Tveiten lukkast med si satsing.

Fleire vil selja
Fleire gav uttrykk for at dei synest vegvesenet sitt krav til avkøyring er dyr. Ordførar Olav Steinar Namtvedt (Sp) avviste ikkje å gå ein ny runde med vegvesenet om dette. Men han viste og til at vegvesenet «veit korleis dei skal stilla krav når dei har sjansen». Feltet vil truleg føra med seg undergang, sjølv om det frå før er gangbru over riksvegen nær skulen. Fungerande rådmann Leif Taule opplyste at andre grunneigarar i nærleiken har signalisert interesse for å selja areal til bustader.