Ubåt-rapport ikkje offentleg

? Delar av rapporten frå firmaet Geoconsult kan verta offentleggjort seinare. Men rapporten som kjem no til helga, må bearbeidast av oss, seier informasjonssjef Ole Arvesen i Kystdirektoratet i Ålesund.

Arvesen seier at det neste som vert offentleg frå deira side, er rådet Fiskeridepartementet vil få om kva som skal gjerast med vraket og kvikksølvet.

? Den innstillinga håpar me skal vera klar til jul, men det kan og henda me ikkje vert klar før over nyttår, seier Arvesen.

Rapporten som kjem til helga, er basert på undersøkingane Geoconsult har gjort av og rundt vraket utanfor Fedje. Undersøkingane resulterte blant anna i at det i oktober vart tatt opp ei flaske som inneheld kvikksølv.

Historiske dokument viser at ubåten hadde omkring 65 tonn kvikksølv om bord då han vart senka 9. februar 1945.

Både frå Fedje kommune og andre hald har det kome krav om heving eller uskadeleggjering av kvikksølvfaren på andre måtar.

Norske styresmakter kan alt ha venta altfor lenge med å setja i verk nødvendige tiltak, heiter det blant anna i ein uttale frå fylkesutvalet i Hordaland. På statsbudsjettet for 2006 er det så langt ikkje sett av pengar til å heva vraket.