Ubåt-svaret kjem i 2012

Det pågår framleis eit utgreiingsarbeid for å vurdera ulike løysingar for det tyske ubåtvraket U864. Vraket ligg vest av Fedje, og utgjer med kvikksølvlasta på kring 65 tonn eit trugsmål mot miljøet.

I løpet av denne hausten er det levert fleire fagrapportar om dei ulike løysingane for vraket, skriv Bergens Tidende.

Framleis står det mellom heving av vraket og deretter mudring, tildekking på botnen, eller ein kombinasjon der deler av vraket vert heva før resten vert dekka til.

Kostnadsoverslaga som er gjort viser at heving og mudring vil kosta 1,770 milliardar kroner. Delvis heving og tildekking kjem på 1,460 milliardar, medan ei tildekking utan heving kjem på 560 millionar, skriv Bergens Tidende.

Hans Petter Mortensholm, prosjektleiar i Kystverket, seier at fagetatens tilråding frå 2010 framleis er gjeldande. Kystverket gjekk då inn for tildekking.

– Me seier ikkje at det er uforsvarleg å heva ubåten, men at det vil vera endå mindre risiko ved ei tildekking, seier Mortensholm.

fakta
•    Den tyske ubåten U-864 vart søkkt av den britiske ubåten HMS «Venturer», 9. februar 1945. Alle om bord omkom.
•    U-864 var på veg frå Tysk­land via Norge til Japan, med personell med teknisk spesialkompetanse, og med krigsmateriell. I lasta var det mellom anna kring 65 tonn metallisk (flytande) kvikksølv, lagra på stålflasker.
•    Vraket av U-864 vart endeleg lokalisert av Sjøforsvaret i mars 2003, etter søk med miniubåt frå KNM «Tyr». Vraket ligg vest for Fedje.
•    Ubåtvraket er delt i to, men for- og akterpartiet synest å vera relativt intakte.
•    Kystverket har ei eiga nettside for U864. Adressa dit er www.kystverket.no/Beredskap/Skipsvrak/Pagaende-prosjekter/U-864/