Ulovleg dumping av søppel

? Det er ikkje godt å seia kvifor enkelte forsøplar på denne måten. Men anten kan det vera at somme trur dei må betala for å levera bosset hit eller at dei ikkje gidd å sjekka opningstidene våre, seier dagleg leiar Hilde Lysø hjå NGIR. Ho meiner at med alle returordningane i dag burde det vera unødvendig med slike private søppeldynger. Dessutan kostar det ingenting å levera boss verken i Kjevikdalen eller på gjenbruksstasjonen i Knarvik så lenge du sorterer bosset sjølv, er privatperson og tilhører regionen. Hjå renovasjonsselskapa i byområda derimot, må ein betala.

Unødvendig forsøpling
Skrothaugane på Åse og ved Fureberget består hovudsakleg av bildelar og dekk samt restar av eit stakittgjerde og plastboss. Ingenting av dette burde vera vanskeleg å kvitta seg med på lovleg måte, meiner Lysø. Ho fortel at av denne bosshaugen kunne NGIR tatt imot alt unnateke bildekka. Dei tek NGIR imot berre så lenge dei følgjer med eit bilvrak. Men dekkforhandlarane tek imot dekk - somme mot nokre kroner, andre gratis.
? Sidan me ikkje vil ha arbeidet med avfelging, har me valt å ikkje ta imot dekk i det heile. Å ta enkelte dekk og ikkje andre trur me berre ville ført til forvirring blant folk, seier Lysø.

Ulike haldningar
Korleis me skal koma slik ulovleg forsøpling til livs er ho ikkje sikker på.
? Eg trur at same kor godt me legg alt til rette, vil det alltid vera dei som synest det er greitt å kasta boss ut bilvindauga. Difor er det viktig at me alle formidlar ei haldning som seier at det ikkje er greitt, seier Hilde Lysø.