Ulovleg med felles rektor på barneskular i Lindås

Det er i ein lovlegkontroll Fytlkesmannen si utdanningsavdeling har kome fram til denne avgjerda. Opplæringsdirektør Kjellbjørg Lunde stadfestar til Strilen at kontrollen er basert på krav frå skulemiljøutvalet i lag med samarbeidsutvalet ved Myking skule, men at utdanningsavdelinga og tok opp saka på eige initiativ.
? Ein rektor på desse skulane er ulovleg, slik me tolkar lova. Og avgjerda kan ikkje ankast. Saka har vorte tilfredstillande opplyst frå administrasjonen i Lindås. Og eg trur ikkje avgjerda kjem overraskande på rådmannen, seier Kjellbjørg Lunde.
Lunde oppfattar situasjonen i Lindås slik at politikarane har bede rådmannen gjennomføra ei omorganisering og har støtta endringane i ettertid.
? Oftast tek me utgangspunkt i eit politisk vedtak når me gjer ein lovlegkontroll, men det har ikkje vore tilfelle her, seier Lunde.
Rektor ved Myking skule, Nils Kvalvågnes, får meldinga frå Strilen tysdag ettermiddag. Han uttrykkjer straks glede for avgjerda og seier at han er innstillt på å halda fram som rektor ved skulen.
? Eg er ikkje medlem i Utdanningsforbundet, men det har vore gjennomført ein formell prosess med tanke på nye jobbar for rektorane som rådmannen tilbydde andre jobbar. For min del hadde det ikkje kome noko avklaring. Og sjølv vil eg seia at avgjerda frå Fylkesmannen ikkje kom overraskande, seier Kvalvågnes.
Også rektor ved Kløvheim skule, Turid Sporsheim Tvedt, er glad for avklaringa. Ho har ikkje noko imot å halda fram som rektor ved skulen som før.
? Eg er medlem i Utdanningsforbundet og er glad for at Fylkesmannen har høyrt på argumenta mot felles rektor for desse skulane. Men avklaringa er heilt fersk, og eg veit ikkje kva ho inneber i praksis. Det er jo ikkje sagt at det vert heilt slik det var, seier Sporsheim Tvedt i ein kort kommentar.
Rådmann Øistein Søvik seier tysdag ettermiddag at ha meiner vedtaket ikkje vil berøra den nye einingsstrukturen.
? Me vil sjå på at dei lokale koordinatorane får eit inspektøransvar. Fylkesmannen er svært opphengt i ressursane som er knytt til skulebygga, seier Søvik. Han viser til at det er rektorane som ikkje vart einingsleiarar, som er tiltenkt stillingane som kordinatorar.
Søvik seier at hans poeng har vore å få meir ressursar til innhald i skulen.
? Høge kostnader kan gje eit press på små skular om det vert ei overbyråkratisering, seier Søvik.