Universitet vil gje nyskaping på Mongstad

– Med industrien på Mongstad har Nordhordland eit fantastisk potensi­ale, og eit godt utgangspunkt for å dra nytte av Universitetet i Bergen.

Det seier professor Grethe Rusten i samband med kontoret som universitetet opna på Mongstad i går.

Kontoret vil i første omgang ikkje ha fast bemanning, men skal vera eit springbrett for utvida aktivitetar i Nordhordland.

– Det må verta eit felles samarbeid som går begge vegar. Me er difor svært opptekne av å få lokale innspel om forsking og kurs me kan ta på oss. Næringsutvikling er óg eit tema me ønskjer å jobba med, seier Rusten.

Næringsretta forsking
UiB ser for seg at etableringa av kontoret på Mongstad vil vera ein pådrivar for samarbeid og samhandling mellom UiB, næringslivet og kommunane.

Gjennom forskningsarbeid, studentprosjekt og kursing retta mot næringslivet ønskjer UiB å komma i tettare kontakt med næringslivet i regionen.

– Med vår kunnskap og kompetanse kan me bidra til nyskaping og innovasjon i regi­­onen, uttaler dekan ved Matematisk-Naturvitenskaplige fakultet, Dag Rune Olsen.

Svært gledeleg
Universitetet vert ønskt varmt velkomen av Regionrådet.

– Det er svært gledeleg at Universitetet i Bergen no etablerer seg med eige kontor på Mongstad, seier avtroppande styreleiar Håkon Matre.

Universitetet i Bergen (UiB) har lenge sett på Mongstad og Nordhordland som eit interessant område for forsking og utvikling.

Når UiB no styrkjer nærleiken til og dialogen med dei viktige industri- og teknologimiljøa i regionen, kan dette skapa grobotn for ytterlegare utvikling hjå begge partar, trur Matre.

Ordførarane Astrid Byrknes i Lindås og avtroppande Ole Lysø i Austrheim uttrykkjer og glede for at UiB kjem til regionen.

– Me er opptekne av å få til meir nærings- og samfunnsutvikling, og det å få forskings- og utviklingsmiljøa aktivt med er viktig, seier Lysø.