Uønska i Noreg, delikatesse i Spania

Høgsesongen for lysingfiske startar etter jonsok og varer til litt ut i august. For tida er det bra med lysing i fjordane.
? Dei siste dagane har eg fått 200 til 250 kilo lysing for dagen. Det er eg godt nøgd med, seier Unneland og viser fram eit par flotte eksemplar som veg omlag seks kilo stykke.
Lysingen er mest verd når den er over seks kilo. Akkurat no ligg prisane til fiskaren på litt over femti kroner kiloen. Dersom fiskane er av ein viss storleik tener fiskarane gjerne 500 kroner per fisk.
? Sesongen er ikkje så lang. Men dersom du står litt på kan du tena relativt bra, på kort tid. Eg fiskar heile året og lever av dette. For meg er lysingfisket ei viktig inntektskjelde, seier Unneland.

Starta tilfeldig
Det var nokså tilfeldig at Unneland byrja å fiska etter lysing.
? Far min og bror min starta å fiska før meg, og opplevde gjerne at dei fekk lysing i breiflabbgarn. Fiskemottaket var villege til å ta imot fisken og etter kvart har interessa for lysingfiske vakse seg større, seier Unneland.
Sjølv fiskar han gjerne lysing med seigarn.
? Arbeidsdagen byrjar i femtida om morgonen. Eg brukar vel omlag to timar heimefrå Ånneland og ut til fiskeplassen. Vanlegvis er eg klar til å levera fangsten til fiskemottaket i Mastrevikane i tretida om ettermiddagen, seier han.
Unneland likar fridomen som yrket gjev han.

Sin eigen sjef
? Du er din eigen sjef, og kan leggja opp dagane slik du vil. Eg trivst med å jobba ute, men eg er ikkje så glad i sommaren. Då er det vert det for varmt. Eg synest hausten og vinteren er den beste årstida, og sidan eg fiskar i fjordane er veret ikkje noko stort problem. Eg har ein god båt, den eignar seg godt til mitt bruk, seier Unneland.
Når lysingfisket og ferien er over satsar han på å oppgradera den 31 fots store Viksund fiskebåten, slik at den vert klar for vintersesongen. ? Eg satsar på fisket som levebrød og kjem nok til å halda på med dette i mange år framover, seier Bjarte Unneland.