Vann 900.000 på Extra-lotteriet

Det hagla med tekstmeldingar og gratulasjonstelefonar etter at folk hadde fått med seg trekninga tysdag kveld, fortel Storemark.
? Eg var åleine heime, og sendte denne gladmeldinga til borna. Sonen min svara og lurte på om eg hadde teke med for mange nullar, seier vinnaren.

Vart stressa
Telefonmeldinga om at ho var trekt ut som Extra-vinnar kom klokka halv åtte tysdag kveld. Ho skulle då få ny telefon klokka halv ni, då trekninga skulle føregå. Ho kunne vinna alt frå eit par hundre tusen til to millionar kroner, men enda altså opp med ein premie på 900.000 kroner.
? Eg vart litt stressa fordi det kom nokre andre telefonar rett før klokka halv ni. Eg måtte berre be dei om å ringja seinare. Dessutan har eg hatt halsvondt i heile januar, og hadde nesten ikkje stemme, fortel Storemark.

Kjøpt på Fedje
? Var det nokon feiring tysdag kveld?
? Eg var høgt oppe, men kjem ikkje til å feira dette før pengane er på konto. Eg vil ikkje bruka pengar før eg veit at eg har dei, seier ho.
Storemark arbeider i den nyoppstarta verksemda AUFERA, som avdelingsleiar for Austrheim og Fedje. Verksemda er eit samarbeid mellom kommunane Austrheim, Radøy og Fedje, og tilrettelegg arbeidsplassar for personar med yrkeshemming.
Loddet var ein femvekers kupong kjøpt på ICA på Fedje, og det var den femte veka på loddet at det vart trekt ut. Storemark er elles ingen storgamblar.
? Eg kjøper eit lodd i ny og ne, når eg høyrer om folk som har vunne, seier ho.