Vaskemiddel laga eksplosjon

? Ut frå det me har kome fram til, kan det vera vaskemiddel som framkalla ein utilsikta reaksjon i tanken, som igjen førde til at der vart danna bobler som var lada med statisk elektrisitet, sa Karl-Jan Erstad frå Rådgivande Agronomar AS på folkemøtet på Dalsøyra i går.
Erstad har vore leigd inn som kjemisk rådgjevar av Vest Tank også før eksplosjonen 24. mai. Han meinte at det kan ha oppstått gneistar då desse boblene sprakk, og dette kan ha utløyst eksplosjonen då gassen i tanken tok fyr. Dette igjen førde til brannen i to av tankane i Sløvåg.
Ingen personar kom fysisk til skade i brannen, men etterpå har mange folk hatt helseproblem på grunn av sterk lukt frå eksplosjonsstaden.

Ikkje vita alt
Erstad fekk spørsmål frå salen om ein ikkje burde føresett ein slik reaksjon på førehand då ein sette i gang prosessen for å reingjera tanken. Det meinte Erstad ikkje.
? Me hadde gjennomført testar i laboratorium på førehand når det gjeld prosessar rundt nøytralisering av stoffa i tanken, men me hadde ikkje testa ut korleis vaskemidlane kunne verka inn på prosessen, sa Erstad.
Han meinte dette var ein reaksjon som ein ikkje kunne forventa at dei skulle ha sett på førehand.
? Når du driv med kjemisk industri, kan det alltid oppstå farlege situasjonar, sjølv om ein må gjera alt ein kan for å unngå det, sa Erstad.

Ikkje klarlagt
Sjølv om Vest Tank no meiner dei har ein teori om kva som utløyste eksplosjonen 24. mai, understreka lensmann Ivar Holmaas på møtet at etterforskinga ikkje er avslutta, og at dei ikkje har trekt nokon konklusjon.
? Me må vita, ikkje berre tru, sa Holmaas.
Han er leiar for etterforskinga. Han fortalde at til no er om lag 30 vitne avhøyrde, men han rekna ikkje med at dei ville leggje fram konklusjon om årsaka til ulukka før i oktober.