Vasskrangel over kommunegrensa

Vatn har skapt høgt trykk i samarbeidet mellom Gulen og Masfjorden. Masfjorden sitt vassverk i Andvik forsyner søre del av Gulen med vatn, og dermed også næringslivet i Sløvåg. Men til tider forsyner dette næringslivet seg så grovt at folk i Masfjorden misser trykket i husa sine fordi høgdebassenget på Hovden går tomt, meiner administrasjonen i Masfjorden. Det må det verta slutt på, og finn ein ikkje anna løysing, vil tilførsla til Gulen verta redusert frå 15. februar for å unngå problem, trugar Masfjorden i eit brev til nabokommunen.

Store problem
? Me får til tider store problem i deler av kommunen på grunn av dette. Trykkproblema forplantar seg langt inn i kommunen, og særleg i ytre Haugsdal er problema store, seier avdelingsleiar Tore Svendsen, som har forfatta «trusselbrevet».
I brevet vert det vist til at Masfjorden sende eit brev om saka i oktober i fjor, utan å få svar frå Gulen. Viss ikkje Gulen svarar innan 15. februar, vil Masfjorden strupa ned røyrdimensjonen, slik at det berre kan tappast 150 kubikkmeter i døgeret, slik avtalen seier.
? No er tolmodet vårt slutt. Me får stadige alarmar på grunn av at trykket fell, og veit ikkje om det er lekkasjar eller sterk tapping i Sløvåg som utløyser desse, seier Svendsen.

Andre tal
? Eg trur ikkje det er fare for nokon vasskrig mellom dei to kommunane, ler ordførar Trude Brosvik i Gulen når Strilen tek kontakt.
Ho meiner dette er noko ein skal finna ut av. Men ho er ikkje sikker på at tala som Masfjorden opererer med, er rette.
? Me har forhøyrt oss med næringslivet i Sløvåg, og deira tapping samsvarar ikkje med dei datoane Masfjorden har meldt om nedtapping, seier ho.
Dessutan tvilar ho på at Masfjorden har levert så mykje vatn som avtalen slår fast.

Høgdebasseng
Ei løysing som har vore drøfta, er at næringslivet byggjer eit eige høgdebasseng i Sløvåg som kan avlasta høgdebassenget i Hovden, på grensa mellom Masfjorden og Gulen. Også andre løysingar har vore framme, men dei to kommunane er usamde om kven som i tilfelle skal ta rekninga.

Opp i møte
Heller ikkje Håkon Matre, ordførar i Masfjorden, trur vassproblema skal forsura tilhøvet mellom dei to kommunane.
? Litt av problemet er at den løysinga som no er, ikkje er tilpassa det behovet som næringslivet i Sløvåg har, seier han.
Alt neste veke skal leiinga i dei to kommunane, saman med leiinga i Gulen og Masfjorden Utbyggingsselskap, koma saman for å drøfta problemet. Og 8. februar skal det vera felles formannskapsmøte mellom dei to kommunane, og der vil vatnet i Sløvåg vera eit tema.