Vasskrise på tusenårsstaden

No må ein ty til vasstankar.
Når mykje folk er samla på ein stad, kjem ein ikkje langt utan vassforsyning. Men på tusenårsstaden på Flolid har dei for tida ikkje vatn til å spyla ned toaletta ein gong.
? Før opninga i fjor vart det laga eit borehol på Flolid. Berekningar viste at det skulle levera 1500 liter i døgeret, men det har vist seg å vera heilt feil, seier driftsleiar Jon Gisle Systaddal i Gulen kommune til Strilen.
Vatnet er også svært skite og heilt ueigna som drikkevatn.

Vasstankar
Vassproblema har ført til at til fylkesleiren i 4H, som skal vera på Flolid i månadsskiftet juni/juli, må ein skaffa drikkevatn til deltakarane med å setja opp vasstankar som vert fylte frå vassverket i Eivindvik.
? Me har kontakta firmaet som laga boreholet, og dei har lova å koma og ta ei utspyling, men me veit ikkje kor mykje det vil hjelpa, seier Systadal.
Truleg kan vatnet ikkje brukast til drikkevatn uansett.

Vassleidning
For å sikra ei permanent vassforsyning til Flolid må ein føra vatn frå Eivindvik. Denne leidningen går i dag berre til idrettsplassen. Mest aktuelt er det å føra vatnet i sjøleidning derifrå til Flolid.
? Eg har ikkje lagt tala for kostnaden fram for formannskap og kommunestyre enno, og ønskjer ikkje å gå ut i avisa med dei først, men det vert nok snakk om fleire hundre tusen kroner, seier Systadal.
Sidan det er fylket sin tusenårsstad, har dei teke kostnaden med boreholet som er laga.