Vegvesenet vil sprøyta i veggrøftene

For å spara miljøet, har kommunestyret i Meland vedteke at det ikkje skal nyttast sprøytemiddel på dei kommunale vegane. Men denne miljøtenkinga tek ikkje Statens vegvesen omsyn til. På riks- og fylkesvegane kjem vegvesenet til å halda fram med å sprøyta med plantevernmiddelet Round Up ? som kan skada den lokale faunaen. Dette skjer sjølv om kommunestyret har bede vegvesenet om å slutta med sprøytemiddel.
? Me ønskjer å respektera dykkar oppmoding om å halda Meland kommune fri frå sprøytemidlar. Likevel må gevinsten ein får av sprøytinga sjåast opp i mot dei meirkostnadane som dei alternative tiltaka vil gje oss, skriv Statens vegvesen i eit brev til Meland kommune.

Kostar meir
Dermed vil vegkantane i Meland verta sprøytefri sone berre ved dei kring 60 kilometerane med kommunal veg. På riks- og fylkesvegane kjem kratt og andre vekstar til å verta fjerna med Round Up.

Vedtak frå 1992
Kommunestyret vedtok alt i 1992 at det ikkje skulle nyttast sprøytemiddel til krattrydding. Men for eit år sidan ville rådmannen byrja å sprøyta vegkantane. Årsaka var pengemangel. Det kostar meir å rydda med maskiner enn med plantevernmiddel. Men ønsket vart blankt avvist av politikarane.
? Me kan ikkje spara pengar på å forgifta befolkninga, sa Tom Sverre Tomren (KrF) til Strilen då.
Round Up, som er det mest aktuelle sprøytemiddelet, inneheld Glyfosat. Stoffet vert rekna for å vera blant dei snillare plantevernmidla.

Monsanto
Produsenten, Monsanto, marknadsfører middelet som eit miljøvenleg produkt. Men Tomren viser til at dette stoffet kan trenga ned i grunnvatnet. Og Landbrukstilsynet konkluderer med at preparatet kan vera giftig for ein del vasslevande organismar, spesielt algar.
Noregs Naturvernforbund meiner at Round Up ikkje bør nyttast i vegkantar.
? Å nytta det på vegkantar er ikkje bra. Stoffet har akutte giftverknader lokalt på ein god del smådyr, og kan endra heile jordfaunaen i området, meiner Per Erik Schultze i Noregs Naturvernforbund.

Round Up
Men der faunaen ved kommunale vegar slepp plantevernmiddel, kjem fauna ved riks- og fylkesvegar til å verta utsett for Round Up. Statens vegvesen vil nytta middelet på stader der det er vanskeleg ? og dermed dyrt - å nytta maskiner. Dette gjeld mellom anna under rekkverk og på vegskuldrer, i vanskelege fjellskjeringar, område med dyrka mark og der det er aggressive ugrasartar som til dømes kjempebjørnekjeks.