Vekst i omsetnaden i Knarvik Senter

– Så langt i 2011 er veksten på 11,7 prosent, samanlikna med same periode i 2010, seier Åge Torsvik, senterleiar i Knarvik Senter.

At veksten for heile perioden er større enn for september, heng saman med at Safari og Expert opna i senteret i fjor sommar. Det er såleis berre for haust­månadene 2011 ein kan gjera ei reell samanlikning, månad for månad, i høve til 2010.

– Me er godt nøgde med at september viser ein vekst på 7,6 prosent. På landsbasis har mange kjøpesenter hatt ein nullvekst, seier Torsvik.

For 2011 totalt anslår Torsvik at senteret kan passera 600 millionar i omsetnad.
– Med ein god julehandel tippar eg at me hamnar på 610 millionar, mot 555 millionar i omsetnad i 2010, seier han.

Plass til kundane
Innføringa av parkeringsautomatar frå januar 2011, der dei handlande må trekka lapp for å kunna parkera gratis i senteret, ser dermed ikkje ut for å ha dempa handlelysta.

– Målet vårt med ordninga er å ha parkeringsplassar til dei som skal handla. Det har me oppnådd, seier Torsvik.

Lappen for parkeringsauto­maten gjev fri parkering i tre timar. Vil ein stå lenger, kan ein trekka ny lapp og få nye tre timar.

– Slike ordningar vil ein nok etter kvart få ved alle handlesenter. Parkeringsplassar er så dyre å opparbeida at ein ikkje kan tilby dette gratis til alle som vil setja frå seg bilen.

Torsvik viser til tal som Thon-gruppen har utarbeidd for sine handlesenter, der konklusjonen er at kvar parkeringsplass bør gje ein omsetnad på ein million kroner.

– Om halvparten av dei parkerte bilane ikkje tilhøyrer handlekundar, vert det dyre parkeringsplassar, seier Torsvik.

700 til tilsette
Parkeringsplassen ved Skyssta­sjo­nen tilhøyrer eigarane av Knarvik Senter, og det vart frå i vår innført ei parkeringsordning også der. Nyleg er plassen også teken i bruk av senteret sine eigne tilsette.

– Totalt sett har me skrive ut 700 parkeringsbevis til tilsette, men sjølvsagt er ikkje alle desse på jobb samstundes.

Torsvik meiner å sjå ein auke i betalande brukarar av par­ker­ings­plassen ved Skysstasjonen.

– Eg trur det er fleire som har funne ut at det ikkje er så dyrt å parkera der, og så ta bussen til Bergen. For mange er dette eit tilbod som ikkje fanst før, for då var denne plassen heilt full tidleg på dagen, seier Åge Torsvik.